ბანერების აღმართვას, რაც ყოვლად მიუღებელი ფაქტია, აქვს ერთ-ერთი მიზანი, რომ აიძულოს ქართული მხარე დაიწყოს საუბარი ოსეთის დეფაქტო ხელისუფლებასთან ე.წ. საზღვრის დემარკაციაზე, რაც ჩვენთვის სრულიად მიუღებელია, - ამის შესახებ საქართველოს პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ დღეს გამართულ პრესკონფერენციაზე განაცხადა.

როგორც ზურაბ აბაშიძემ აღნიშნა, არ არის გამორიცხული, რომ ბანერების აღმართვის პროცესი გაგრძელდეს.

"ჩვენ ვერ დავიწყებთ დეფაქტო ხელისუფლებასთან რაიმე სახის მოლაპარაკებებს. გავაგრძელებთ და მაქსიმალურად შევეცდებით, ჩვენი მხრიდან საერთაშორისო თანამეგობრობის, ჩვენი დასავლელი პარტნიორების ზეწოლით ეს პროცესი შეჩერდეს, შეწყდეს და დაიწყოს ამ პრობლემების მოგვარება. ამას საქართველოს ხელისუფლება ცდილობს ყოველდღიურ რეჟიმში ცდილობს", - განაცხადა ზურაბ აბაშიძემ.

მისი განცხადებით, ქვეყნის ხელისუფლების საგარეო პოლიტიკის ძალისხმევის 80% ყოველდღიური მიდის უმძიმესი პრობლემების მოგვარების კუთხით.

"ეს პრობლემები, რომელიც ასეთი მძიმე ფორმით შეიქმნა და მოსდევს 2008 წლის ომს და მისი შედეგია მნიშვნელოვანწილად, არის ჩვენი საგარეო პოლიტიკის მთავარი სამიზნე, რათა მოხდეს მათი მინიმიზირება და ეტაპობრივი მოგვარება", - განაცხადა ზურაბ აბაშიძემ.