ბათუმის მერიასთან გონიოში მცხოვრებლები აქციას მართავენ.
აქციის მონაწილეები მიწების დაბრუნებას ითხოვენ.
დღევანდელ აქციაზე 50-მდე ოჯახი მერიისგან მოითხოვს, სააპელაციო სასამართლოში არ გასაჩივრდეს ბათუმის საქალაქო სასამართლოს გადაწყვეტილება, რომლითაც გაუქმდა მერიის საკუთრების აღიარების კომისიის ბოლო დადგენილება გონიოს მიწების თაობაზე.
აქციის მონაწილეთა განცხადებით, ამ დადგენილებამ მათ ფაქტობრივად მიწის ნაკვეთების დაბრუნების შესაძლებლობა წაართვა, ამიტომაც მიმართეს სასამართლოს.
გადაწყვეტილება, რომლითაც გონიოში მცხოვრებმა ოჯახებმა მერიას სასამართლო დავა მოუგეს, აქციის მონაწილეებს დღეს ჩაბარდათ.
"მერია ერთკვირიანი ვადა აქვს გადაწყვეტილების გასასაჩივრებლად. გადაწყვეტილების გასაჩივრების შემთხვევაში, კიდევ რამდენიმე წელი გაიწელება სამართლებრივი დავის პროცესი , ამიტომაც ვითხოვთ მერიამ შეწყვიტოს უკანონო გადაწყვეტილებების დაცვა. საოცარია, რამდენი სასამართლო პროცესი მოვიგეთ და ეს ხალხი ისევ ზის სკამებზე და ისევ იმას აგრძელებს, რაც აქამდე უკეთებიათ. ჩვენ სტრასბურგამდე ვივლით, რამდენიმე საჩივარი უკვე გაგზავნილიცაა", - აცხადებს აქციის მონაწილე ენვერ ირემაძე, რომელმაც მერიის წინ საჯაროდ დახია საკუთრების აღიარების კომისიის მიერ სხვადასხვა დროს გონიოს მიწებთან დაკავშირებით მიღებული გადაწყვეტილებები.