უშიშროების საბჭოს მდივანი დავით რაქვიაშვილი კონფლიქტის ზონას ესტუმრა. ოკუპირებული ცხინვალის მიერ დაანონსებული სადემარკაციო სამუშაოები ოკუპირებულ სოფლებში ავლევში, კნოლევსა და ცერონისში საოკუპაციო ხაზი ხნულებით მონიშნეს.
სამივე სოფელში ე.წ. საზღვრის აღმნიშვნელი ბანერები ჯერ კიდევ ერთი წლის წინ დამონტაჟდა. უშიშროების საბჭოს მდივანი საოკუპაციო ზოლთან მდებარე სოფლებში ჩავიდა და იქ არსებულ მდგომარეობას გაეცნო.
დავით რაქვიაშვილმა მიმდინარე პროცესს, საქართველოს ტერიტორიული მთლიანობის და სუვერენიტეტის ხელყოფის კიდევ ერთი მორიგი აგრესიული აქტი უწოდა.
დავით რაქვიაშვილი პოლიტიკურ პარტიებს, საზოგადოებას და არასამთავრობო სექტორს გაერთიანებისკენ მოუწოდებს.
შიდა ქართლის გუბერნატორის განცხადებით, ყველაფერს აკეთებენ, რომ მოსახლეობამ ოკუპირებულ ტერიტორიაზე მოხვედრილ მიწებზე მოსავალი აიღოს.
კახა სამხარაძის განცხადებით, აღნიშნულ პროვოკაციას ქართული მხარე არ უნდა აჰყვეს და მისი თქმით, დაკარგული ტერიტორიების დაბრუნება მშვიდობიანი გზით უნდა მოხდეს.