საოკუპაციო ზოლში მცხოვრები ოჯახები ახალი საფრთხის წინაშე დგანან. ქარელის რაიონის სამ სოფელში ე.წ. საზღვრის ხნულებით მონიშვნის შემდეგ, ადგილობრივები შიშობენ, რომ კუთვნილ მიწებს და საძოვრებს დაკარგავენ.
ახლადგავლებულ ხნულებს რამდენიმე ათეული მეტრი აშორებს იმ ე.წ. ბანერებთან, რომლებიც რუსმა სამხედროებმა კნოლევში, ავლევსა და ცერონისში ერთი წლის წინ დაამონტაჟეს.
უკანონო ბორდერიზაციას და საოკუპაციო რეჟიმის ბოლო პროვოკაციულ ქმედებებს უკვე გაეცნენ საგარეო საქმეთა სამინისტროში მისული დიპლომატები.
ოფიციალური თბილისი საერთაშორისო ზეწოლის გაძლიერებაზე საუბრობს. მცოცავი ოკუპაციის ფონზე, მოსკოვში ვიზიტით მყოფი ქართველი დეპუტატების ჯგუფი პატრიოტთა ალიანსიდან რუსეთს მოლაპარაკების ახალ ფორმატებს სთავაზობს, რაც საქართველოს მთავრობისთვის კატეგორიულად მიუღებელია.