მე მივიღე სამეკავშირეო ოფისიდან ბოლო ინფორმაცია ადგილზე არსებული ვითარების შესახებ. ეს ინფორმაცია და რაც ხდება, შემაშფოთებელია, - ამის შესახებ საზოგადოებრივს ნატო-ს გენერალური მდივნის სპეციალურმა წარმომადგენელმა კავკასიასა და ცენტრალურ აზიაში, ჯეიმს აპატურაიმ საოკუპაციო ხაზის გადმოწევისა და ე.წ. სასაზღვრო ბანერების მონტაჟის თემაზე განუცხადა.
„ჩრდილოატლანტიკური ალიანსი ყურადღებით ადევნებს თვალს რუსეთისა და მათი მოკავშირეების რეგულარულ გადაადგილებებს ე.წ. ადმინისტრაციული საზღვრის წინ წამოწევის მიზნით. ყველამ იცის და ვფიქრობ, ყველა თანხმდება, რომ ნატოს არ შეუძლია პირდაპირ ჩარევა, მაგრამ ჩვენ შეგვიძლია გამოვხატოთ შეშფოთება და უარყოფითი დამოკიდებულება ამ ნაბიჯების მიმართ.
ნატო ამბობს, რომ აღიარებს საქართველოს ტერიტორიულ მთლიანობასა და სუვერენიტეტს საერთაშორისოდ აღიარებულ საზღვრებში და ეს პოზიცია არ შეცვლილა.
ჩვენ ძალიან კარგად გვესმის, რომ ადგილობრივებს ექმნებათ პრობლემები, მათ არ აქვთ წვდომა სასოფლო-სამეურნეო მიწებზე, ვერ ნახულობენ ოჯახის წევრებს, ვერ იღებენ სამედიცინო მომსახურებას. ვხედავთ საქართველოს წინაშე უსაფრთხოებისა და ეკონომიკური თვალსაზრისით არსებულ გამოწვევებს.
მხარს ვუჭერთ ევროკავშირის მონიტორინგის მისიას, რომელიც უდიდეს საქმეს აკეთებს საერთაშორისო საზოგადოების ყურადღების მისაზიდად. საქართველოს აქვს ნატო-სგან პოლიტიკური მხარდაჭერა. ის საერთო სირთულე, რაც აქვს რუსეთს დასავლეთთან ურთიერთობებში, არის განპირობებული საქართველოს გამოც. უკრაინა არის ახალ ამბებში, მაგრამ ვიცით, რომ ეს არის რუსეთის პოლიტიკის გაგრძელება და ამიტომ მოვუწოდებთ რუსეთს, რომ დაუბრუნდეს საერთაშოროსო ნორმებისა და კანონების ჩარჩოებს.
რუსეთის ქმედებების გამო, უფრო და უფრო მეტი ადამიანი ზარალდება. უნდა შევინარჩუნოთ ყურადღება, გავაგრძელოთ ზეწოლა. ნატო გააკეთებს, რაც მასზეა დამოკიდებული, ევროკავშირი შეასრულებს მის როლს. მინდა დაგარწმუნოთ, რომ ნატო გააკეთებს მაქსიმუმს“, - განაცხადა აპატურაიმ.