რუსეთი აგრძელებს საქართველოს ტერიტორიების ოკუპაციას, ჩვენ ვნახეთ, თუ რისი გაკეთებისთვის იყო იგი მზად 2008 წელს, უდაოდ არავის სურს ამის გამეორება, - განაცხადა ჟურნალისტებთან „ევროპული პოლიტიკის ცენტრის“ პოლიტიკურმა ანალიტიკოსმა ამანდა პოლმა.
მისივე თქმით, ყველამ იცის, რომ თუ საჭირო გახდა, რუსეთი მზადაა გამოიყენოს სამხედრო ძალა. პოლის განცხადებით, საქართველომ უნდა გააგრძელოს პრობლემის მშვიდობიანი გზით გადაწყვეტა.
„ჩვენ ვიცით, რომ თუ საჭირო გახდა, რუსეთი მზადაა გამოიყენოს სამხედრო ძალა, გადაწყვეტის გზები უნდა მონახონ დიპლომატებმა, სამშვიდობო გზები და არა სამხედრო ძალის წნეხით. ამავდროულად ვხედავთ, რომ რუსეთი კვლავ წევს საზღვარს და საქართველოს ტერიტორიების კიდევ უფრო მეტ ნაწილს იკავებს. ვფიქრობ, ახლა საქმე საერთაშორისო საზოგადოებაზეა, რომ შესაძებლობების ფარგლებში აჩვენონ შესაბამისი პასუხი, რომ დააწესონ რუსეთის მიმართ სანქციები საქართველოს ტერიტორიების ოკუპაციის გამო. საქართველომ კი უნდა გააგრძელოს პრობლემის სამშვიდობო გზით გადაწყვეტა და არ მიიღოს ის ზომები, რაც მიღებულ იქნა 2008 წელს", - აღნიშნა პოლმა.
პოლიტიკურმა ანალიტიკოსმა ასევე აღმოსავლეთ პარტნიორობაზეც ისაუბრა.
"აღმოსავლეთ პარტნიორობა ჯერ კიდევ სასარგებლო ბევრი მიმართულებით, რადგან მნიშვნელოვანია რომ ამ 6 ქვეყანას შორის არსებობდეს კავშირი. ამავე დროს ჩვენ ვხედავთ მნიშნელოვან განსხვავებებსა და მისწრაფებებს, ეს ნიშნავს რომ ევროკავშირს აქვს განსხვავებული ურთიერთობები თითოეულ ქვეყანასთან, რაც საკმაოდ ნორმალურია, რადგან ყველა ამ ქვეყანას აქვს განსხვავებული ამბიცია და ეს არის იმის მიზეზი, რომ თითოეულთან განსხვავებული მიდგომა არსებობდეს", - განაცხადა ამანდა პოლმა.