სკრინინგ ცენტრებში მიზნობრივი ასაკობრივი ჯგუფის მიმართვიანობის დაბალი მაჩვენებელი, არასრულყოფილი დაფინანსება რეგიონებში და შემდგომ პერიოდში საკონტროლო კვლევების დაუფინანსებლობა, ესაა ის ძირითადი გამოწვევები რასაც ძუძუს კიბოსთან ბრძოლის მიმართულებით მომუშავე ორგანიზაციები ასახელებენ.

,,ევროპა დონა საქართველოს“, ორგანიზებით, მრგვალი მაგიდის ფორმატით, არსებულ მდგომარეობასა და გამოწვევებზე სახელმწიფო სტრუქტურების წარმომადგენლებმა, სპეციალისტებმა, პაციენტებმა და მედიის წარმომადგენლებმა ერთობლივად იმსჯელეს.

პრობლემების იდენტიფიცირების შემდგომ, სამოქმედო გეგმის მონახაზი მომზადდება, რომელიც სახელმწიფო უწყებებს წარედგინება. ღონისძიება საინფორმაციო კამპანიის ,,სამიზნე სიცოცხლისთვის“ ფარგლებში გაიმართა.

„პაციენტს დიაგნოზის დასმიდან უკვე უჩნდება ფინანსური პრობლემა. სახელმწიფოს მხრიდან უნდა იყოს დაფინანსების ან თანადაფინანსების პროექტი და საფიქრალი არ ჰქონდეს დაავადებულს, იგივე რეაბილიტაციის თემა, იგივე მეტასტაზური ძუძუს კიბოს მკურნალობა. არ ფინანსდება მთელი რიგი პრეპარატები.

თბილისში არის თარგეტული თერაპიის პროექტი მეტასტაზური პაციენტებისთვის, რომელსაც თბილისი მერია ახორციელებს, რეგიონებში მაცხოვრებელი მეტასტაზური პაცინტებისთვის ეს პროექტი არ არის“, - აცხადებს ანა მაზანაშვილი „ევროპა დონა საქართველოს“ წარმომადგენელი.

თბილისის საკრებულოს ჯანდაცვისა და სოციალურ საკითხთა კომისიის თავმჯდომარე ირაკლი ფავლენიშვილი ამბობს, რომ მაქსიმალურად ეცდებიან, არასამთავრობოების შენიშვნები გაითვალისწინონ.

„არის შენიშვნები, რომლებზეც დღეს ისაუბრეს, მაგალითად იმაზე, რომ არ ფინანსდება ფსიქოსოციალური რეაბილიტაცია. დანარჩენი 80-90 პროცენტი ავადმყოფობებისა თბილისის მუნიციპალიტეტის მიერ, ასე ვთქვათ ფინანსდება, აქ გამოთქმულ მოსაზრებებსაც გავითვალისწინებთ და ვეცდებით, ამ ადამიანებს მაქსიმალურად დავუდგეთ გვერდზე,“, - განაცხადა ფავლენიშვილმა.