გადაკეტილი ბოსფორის ხიდი, დაბომბილი პარლამენტი, სამხედრო ტექნიკა ქუჩებში - ასეთი იყო თურქეთისთვის 2016 წლის 15 ივლისის ღამე. ოფიციალური მონაცემებით, ღამის საათებში დაწყებულ შეიარაღებულ ამბოხს 200-ზე მეტი ადამიანი ემსხვერპლა.

სამხედრო გადატრიალების მცდელობა რამდენიმე საათში აღკვეთილად გამოცხადდა: ოფიციალურმა ანკარამ მომხდარში ამერიკაში მოღვაწე ფეთჰულა გიულენი დაადანაშაულა, რომელიც მომხდართან რაიმე კავშირს დღემდე კატეგორიულად უარყოფს.

ამბოხის აღკვეთას მალევე მასობრივი დაპატიმრებები და მასშტაბური საკადრო წმენდა მოჰყვა, რის გამოც თურქეთის ხელისუფლება არაერთხელ გახდა საერთაშორისო ორგანიზაციების კრიტიკის სამიზნე. დაკავებები ახლაც გრძელდება.