თურქეთში სახელმწიფო გადატრიალების მცდელობიდან ერთი წლისთავის აღსანიშნავად ემზადებიან.

სტამბოლში, ანკარასა და ქვეყნის თითქმის ყველა რეგიონში ეროვნული ერთობის მარშია დაგეგმილი. ხმამაღლა წაიკითხავენ იმ 250 ადამინის სახელსა და გვარებს, რომლებიც 15 ივლისის ტრაგიკულ მოვლენებს შეეწირა.

ბოსფორის ხიდზე, რომელსაც გასული წლის 15 ივლისის შემდეგ დასახელება შეუცვალეს და ახლა წამებულთა ხიდი ჰქვია, დაღუპულთა საპატივცემულოდ მონუმენტი გაიხსნება.

ცერემონიაში მონაწილეობას მიიღებს ქვეყნის პრეზიდენტი. გავრცელებული ინფორმაციით, ის მოსახლეობას სიტყვით მიმართავს.

პარალელურად, გრძელდება დაკავებებისა და სამსახურიდან გათავისუფლების სერია. დღეს ცნობილი გახდა, რომ სამსახურიდან გაათავისუფლეს შვიდი ათასი ადამიანი, მათ შორის არიან პოლიციელები და ჩინოვნიკები.

2016 წლის 15 ივლისის საღამოს ქვეყანაში სამხედრო გადატრიალების მცდელობა იყო. ხელისუფლებამ ამბოხი ჩაახშო. ქვეყნის პრეზიდენტმა მომხდარში ამერიკის შეერთებულ შტატებში მცხოვრები მქადაგებელი ფეთჰულა გიულენი დაადანაშაულა.

ოფიციალური ანკარა შეერთებულ შტატებს მის ექსტრადაციას სთხოვს, თუმცა აშშ-ში ამბობენ, რომ საკმარისი მტკიცებულებების არარსებობის შემთხვევაში, გიულენის ექსტრადიცია არ განხორციელდება.

ამ დღის შემდეგ, თურქეთში თითქმის 50 ათასი ადამიანი დააკავეს,140 ათასი კი სამსახურიდან გაათავისუფლეს.