ამერიკის შეერთებულ შტატებში იარაღის შეძენაზე კონტროლის გამკაცრება მოითხოვეს.
reuters-ის ინფორმაციით, აღნიშნული ლოზუნგით აქტივისტები ვაშინგტონში იუსტიციის დეპარტამენტთან შეიკრიბნენ და ამ კუთხით ტრამპის პოლიტიკა გააპროტესტეს. შემდეგ კი მომიტინგეებმა „მსროლელთა ეროვნული ასოციაციის“ შტაბბინისკენ საპროტესტო მსვლელობა მოაწყვეს.
აქციის მონაწილეები მიიჩნევენ, რომ ასოციაციის წევრები აშშ-ში ძალადობის ესკალაციას უწყობენ ხელს. მათი თქმით, იმის გამო, რომ შტატებში იარაღის შეძენაზე კანონი არ მკაცრდება, ყოველწლიურად ათასობით ადამიანი იღუპება. ოფიციალური მონაცემების მიხედვით, მხოლოდ 2014 წელს აშშ-ში ცეცხლსასროლი იარაღიდან ნასროლ ტყვიას 33 ათასზე მეტი ადამიანის სიცოცხლე ემსხვერპლა. მათ შორის, 10 ათასი მკვლელობას შეეწირა.