თურქეთში არშემდგარი სახელმწიფო გადატრიალებიდან ერთი წელი აღნიშნეს. მიტინგები და მსვლელობები თურქეთის ათეულობით ქალაქში გაიმართა.

2016 წლის ივლისში მოწყობილი პუტჩის მცდელობიდან ერთი წლის თავზე ქუჩაში ათეულობით ათასი თურქი გავიდა. ბევრი მათგანი სტამბოლში ბოსფორის სრუტეზე გამავალ ხიდზე შეიკრიბა, სადაც ერთი წლის წინ ამბოხებულ სამხედროებსა და მშვიდობიან მოქალაქეებს შორის შეტაკება მოხდა.

15 ივლისს ღამით აღნიშნულ ხიდზე 34 ადამიანი დაიღუპა. თურქეთის მთავრობამ ხიდზე დაღუპულების მემორიალი გახსნა. შეკრებილებს პრეზიდენტმა მიმართა.

რეჯეფ თაიფ ერდოღანის თქმით, თურქეთის მთავრობა მოღალატეებს არ დაინდობს. თურქეთის ლიდერმა კიდევ ერთხელ განაცხადა, რომ მხარს უჭერს სიკვდილით დასჯის შემოღებას და ასევე გამოვიდა ინიციატივით, რომ სახელმწიფო გადატრიალებაში მონაწილეებს გუანტანამოს პატიმრების მსგავსი ფორმა ეცვათ.

თურქეთში სახელმწიფო გადატრიალების მცდელობას შარშან მსხვერპლი მოჰყვა. ოფიციალური ინფორმაციით დაიღუპა 260 ადამიანი. თურქეთის მთავრობა ამბოხის სულისჩამდგმელად აშშ-ში მცხოვრებ ოპოზიციონერ მქადაგებელ ფეთჰულა გიოულენს მიიჩნევს. ერთი წლის განმავლობაში თურქეთში 50 ათასი ადამიანი დააკავეს. მათ ბრალად გიულენის მოძრაობის წევრობა ედებათ. ანალოგიური ბრალდებით 150 ათასზე მეტი სახელმწიფო მოხელე თანამდებობიდან გაათავისუფლეს.