ტრაპიზონთან ახლოს მომხდარი ავტოავარიის შედეგად დაშავებული ბავშვების მდგომარეობა სტაბილურია.

როგორც „მოამბის“ ჟურნალისტი ადგილიდან იუწყება, ამ დროისთვის საავადმყოფოებში მხოლოდ 4 მათგანი რჩება, რომელთაც მალე გამოწერენ. ისინი რამდენიმე საავადმყოფოში არიან გადანაწილებულნი.

რაც შეეხება უფროსებს, ერთ-ერთ მშობელს სავარაუდოდ ფეხის ამპუტაცია დასჭირდება.

დაშავებულები მოინახულა აჭარის მთავრობის თავმჯდომარემ რეგიონის ჯანდაცვის მინისტრთან ერთად. ბავშვების სამშობლოში დაბრუნებას სავარაუდოდ დღესვე უზრუნველყოფს თურქული მხარე.

როგორც ბავშვების მშობლები ამბობენ, შემთხვევა დილის 05:30 საათზე მოხდა, მათივე თქმით, უმრავლესობას ამ დროს ეძინა.

მშობლების თქმით, ა​ვტობუსი ამოყირავდა, თუმცა რა გახდა შემთხვევის მიზეზი, ამის შესახებ ვერაფერს ამბობენ.

თურქეთში ავტობუსი, რომელსაც ქართული ცეკვის ანსამბლ „ლამპრების“ წევრები გადაჰყავდა, ავარიაში მოჰყვა.

საქართველოს საგარეო საქმეთა სამინისტროს ცნობით, ავტოსაგზაო შემთხვევა გირესუნის მახლობლად (120 კმ. ტრაპიზონიდან და 320 კმ. სარფიდან) მოხდა.


ავარიის შედეგად 38 ადამიანი დაშავდა.