სტრასბურგის ადამიანის უფლებათა სასამართლოში მომავალ კვირაში აფგან მუხთარლის ადვოკატები სარჩელს სახელწოდებით - „აფგან მუხთარლი აზერბაიჯანისა და საქართველოს წინააღმდეგ“ შეიტანენ.
როგორც მუხთარლის ადვოკატი არჩილ ჩოფიკაშვილი საზოგადოებრივთან საუბრისას აცხადებს, ევროსასამართლოში დავის საგანი იქნება აფგან მუხთარლის არაოფიციალური ექსტრადაცია საქართველოდან აზერბაიჯანში ყოველგვარი უფლებების გამოყენების გარეშე.
მისი თქმით, გატაცების დროს მოხდა ადამიანის უფლებების საერთშორისო კონვენციის დარღვევაა, რის საფუძველზეც კითხვის ნიშნები იბადება და სწორედ ამიტომ, ადვოკატები ევროსასამართლოს მიმართავენ.
ადვოკატის განცხადებით, აფგან მუხთარლის მიმართ ადგილი აქვს წამებასა და არაადამიანურ მოპყრობას, თავისუფლების უკანონო აღკვეთას.
„ხელყოფილია პირადი ცხოვრების ხელშეუხებლობა, გამოხატვის თავისუფლება და სამართლიანი სასამართლოს უფლება. სწორედ ევროსასამართლო იქნება ეფექტური საშუალება აფგან მუხთარლის უფლებების დასაცავად“,- განაცხადა ადვოკატმა.
ჟურნალისტის საქმეზე აზერბაიჯანში გამოძიება საზღვრის უკანონო გადაკვეთისა და კონტრაბანდის მუხლებით დაიწყო. ჟურნალისტის საქმესთან დაკავშირებით, საქართველოს შინაგან საქმეთა სამინისტრომ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.