საქართველოს ეროვნული მუზეუმის კოლექციებში დაცული ვასილი კანდინსკის ორი ცნობილი ნამუშევარი „სურათი წრით - პირველი უსაგნო“ და „შავი შტრიხი“ მილანიდან თბილისში დაბრუნდა და ხელოვნების მუზეუმის საგამოფენო დარბაზში დაიკიდა.

ნახატები მილანის კულტურის მუზეუმში (MUDEC), ექსპოზიციაზე „მოხეტიალე რაინდი. გზა აბსტრაქციამდე“ იყო წარმოდგენილი, რომელიც 15 მარტს გაიხსნა და 9 ივლისის დასრულდა.

წარმოშობით რუსი მხატვრის ორი ძალზედ მნიშვნელოვანი და საეტაპო ნამუშევარი, წლებია არაერთ საინტერესო და აღაირებულ საგამოფენო დარბაზში, ვასილი კანდინსკის შემოქმედების ამსახველი საერთაშორისო გამოფენების ნაწილია. გასულ წლებში ნახატები პარიზის პომპიდუს ცენტრში, ნიუ-იორკის გუგენჰეიმის და ბრიუსელის სამეფო მუზეუმებში იყო გამოფენილი.

ეროვნული მუზეუმის ახალი და თანამედროვე ხელოვნების კურატორი ნინო ხუნდაძე საზოგადოებრივთან საუბარში აცხადებს, რომ კანდინსკის შედევრების გამოფენა ხელოვნების მუზეუმში მნიშვნელოვანი მოვლენაა. ეს ნახატები 30-იანი წლებიდან საქართველოს საკუთრებაა და ძალიან ხშირად არის წარმოდგენილი მსოფლიოს სხვასდასხვა მუზეუმში. ერთ-ერთი ტილო, კანდინკის პირველი აბსტრაქცია „სურათი წრით - პირველი უსაგნო“, მსოფლიოში დიდხანს დაკარგულად მიაჩნდათ.

ეროვნული მუზეუმის რესტავრატორი ეკა თევზაძე, ვასილი კანდინკის ნახატებს მილანში საერთაშორისო გამოფენაზე თავად ახლდა. ორივე ტილოს მდგომარეობა დამაკმაყოფილებელია.

ვასილი კანდინსკის ორი ცნობილი ნამუშევარი „სურათი წრით - პირველი უსაგნო“ (1911. ტილო, ზეთი) და „შავი შტრიხი“ (1920. ტილო, ზეთი) შალვა ამირანაშვილის სახელობის ხელოვნების მუზეუმის საგამოფენო დარბაზში სავარაუდოდ, ნოემბრამდე იქნება გამოფენილი და მისი ნახვა დამვალიერებელს ხვალიდან შეეძლება.