„რეგიონული თეატრების საერთაშორისო ფესტივალი 2017“ 21-30 ივლისს, ფოთის ვალერიან გუნიას სახელობის პროფესიულ სახელმწიფო დრამატულ თეატრში გაიმართება.

ქართველი მაყურებლის წინაშე წარდგება სამი ირანული დასი - „დიმაკ თეატრალური ჯგუფი“, „ხმა სიჩუმე, მოძრაობა“, „კრეატიული თეატრალური კომპანია“, პოლონეთის ქალაქ შცეცინის თეატრალური კომპანია „ნიემა“, ხარკოვის თეატრალური დასი, უკრაინის დასი - „პუბლიცისტი“ და თეატრი „ესკიზები სივრცეში“ რუსეთიდან.

რეგიონული თეატრების ფოთის საერთაშორისო ფესტივალის ფარგლებში გაიმართება ვორქ-შოპები და მასტერკლასები. ერთ-ერთ მასტერკლასს ირანელ ახალგაზრდა მსახიობებს ჩაუტარებს ფესტივალის სამხატვრო ხელმძღვანელი, მსახიობი ნინელი ჭანკვეტაძე; დაგეგმილია საერთაშორისო თეატრალური სემინარის „თეატრის მართვა და თანამედროვეობა“ გამართვა.

ფესტივალი 30 ივლისს, სპეციალური პერფორმანსით დაიხურება, რომელსაც იტალიიდან მოწვეული მსახიობი და რეჟისორი კლაუდიო დი მალიო დადგამს. დადგმაში მონაწილეობას მიიღებენ ქართული რეგიონული თეატრების მსახიობები.

რეგიონული თეატრების ფოთის საერთაშორისო ფესტივალი 2015 წელს, საქართველოს კულტურისა და ძეგლთა დაცვის სამინისტროს მხარდაჭერით დაფუძნდა. ღონისძიების ორგანიზატორია კულტურულ-საგანმანათლებლო ფონდი ,,დღეს’’ (დამფუძნებელი მსახიობი ნინელი ჭანკვეტაძე).

ფესტივალში მონაწილეობას როგორც საქართველოს სხვადასხვა რეგიონის თეატრები, ასევე უცხოეთიდან მოწვეული თეატრალური კოლექტივები მიიღებენ.

ფესტივალს დაესწრება სპეციალურად მოწვეული საერთაშორისო თეატრალური ფესტივალების დირექტორატი (მოლდოვა, ბელორუსია, სომხეთი, ესპანეთი, ირლანდია, პოლონეთი, ისრაელი, იტალია, სერბეთი).