საქართველოში ვიზიტის ბოლო დღეს უკრაინის პრეზიდენტი საოკუპაციო ხაზთან არსებულ ვითარებას ეცნობა. პეტრო პოროშენკო, საქართველოს პრეზიდენტ გიორგი მარგველაშვილთან ერთად, ოკუპირებულ ახალგორთან, სოფელ ოძისში ჩავიდა.
პეტრო პოროშენკომ ოძისის ქართული საგუშაგოდან ოკუპირებული ახმაჯის რუსული სამხედრო ბაზა დაათვალიერა. პრეზიდენტებმა ოძისიდან ერთი კილომეტრის მანძილზე განთავსებული რუსული ბაზა დურბინდით დაათვალიერეს.
ოძისიდან ორი ქვეყნის პრეზიდენტები სოფელ ხურვალეთში ჩავლენ, სადაც ევროკავშირის სადამკვირვებლო მისიის წარმომადგენლებს შეხვდებიან.
საოკუპაციო ზოლში შექმნილი მდგომარეობის შესახებ პეტრო პოროშენკო ევროკავშირის მონიტორებისგან ადგილზე მიიღებს დეტალურ ინფორმაციას. სოფელ ხურვალეთში უკრაინის პრეზიდენტს საოკუპაციო ზოლის უფრო ახლოს დათვალიერების შესაძლებლობა ექნება.
პეტრო პოროშენკო სოფელ ხურვალეთში იმ ადგილს ნახავს, სადაც ე.წ საზღვარი მავთულხლართებითაა დაფიქსირებული და ოკუპირებულ ტერიტორიაზე მოქცეულ ვანიშვილების ოჯახს გასაუბრება.
მოსკოვის საოკუპაციო პოლიტიკა და ორ ქვეყანას შორის ერთიანი პოზიციის არსებობა რუსეთის აგრესიული პოლიტიკის წინააღმდეგ პეტრო პოროშენკოს მიერ გამართულ ყველა შეხვედრაზე მთავარი თემა იყო.
ვიზიტის დროს უკრაინის პრეზიდენტმა საერთაშორისო ორგანიზაციებს საქართველოდან მიმართა და რუსეთზე ზეწოლის გაგრძელებისკენ მოუწოდა.