ამბასადორიალის მეორე დღე გაიხსნა. სამუშაო სესიაზე მე-9 მოწვევის პარლამენტის საქმიანობის ძირითადი მიმართულებები და საკონსტიტუციო ცვლილებების პროცესი განიხილება.
საუბარი შეეხება სასამართლო რეფორმას, ადამიანის უფლებების დაცვის საკითხებს. ასევე, განსახილველ საკითხებს შორისაა სუვერენიტეტი და ტერიტორიული მთლიანობა, ევროპული და ევროატლანტიკური ინტეგრაცია, დეზინფორმაცია და ანტიდასავლური პროპაგანდა.
„ამბასადორიალი 2017-ის“ ფარგლებში, გაიმართება შეხვედრა არასამთავრობო ორგანიზაციების წარმომადგენლებთაბაც. როგორც ვიცე-პრემიერმა და საგარეო საქმეთა მინისტრმა, მიხეილ ჯანელიძემ აღნიშნა, დღევანდელი დღე მნიშვნელოვანია იმით, რომ ყველა პრიორიტეტზე მოხდება მსჯელობა მთავრობის წევრებთან ერთად.
„ჩვენი დღევანდელი შეხვედრა იხსნება პანელით, რომელიც მიეძღვნება დემოკრატიულ პროცესებს ჩვენს ქვეყანაში და რომელშიც მონაწილეობას მიიღებს პარლამენტის თავმჯდომარე, ასევე იუსტიციის მინისტრი. ის დემოკრატიული პროცესები, რომელიც ქვეყანაში ვითარდება, ჩვენ ხელს გვიწყობს, რომ წარმატებულები ვიყოთ საგარეო ასპარეზზე და მივაღწიოთ ყველა იმ მნიშვნელოვან შედეგს საგარეო პოლიტიკური მიმართულებით, რაც ჩვენი ქვეყნისთვის უმნიშვნელოვანესია. ეს არის ევროპული და ევროატლანტიკური ინტეგრაცია. დღეს ვიმსჯელებთ ასევე იმ შემდგომ რეფორმებზე, რომელიც კიდევ უფრო გააძლიერებს ჩვენს დემოკრატიულ ინსტიტუტებს და გააძლიერებს ჩვენს ნაბიჯებს ევროპულ და ევროატლანტიკური ინტეგრაციის გზაზე“, - განაცხადა ჯანელიძემ.