საქართველოს მოქალაქეებს კატარის სახელმწიფოს ვიზის წინასწარ აღება აღარ დასჭირდებათ, - ამის შესახებ საზოგადოებრივს კატარში საქართველოს საგანგებო და სრულუფლებიანმა ელჩმა, ეკატერინე მაიერინგ-მიქაძემ განუცხადა.

"რეალურად, ეს სიახლე ძალაში შევიდა 12 ივლისს, რაც გულისხმობს, რომ საქართველოს მოქალაქეებს აღარ სჭირდებათ წინასწარ კატარის სახელმწიფოს ვიზის აღება, არამედ შეუძლიათ, იგი საზღვარზევე, დოჰას საერთაშორისო აეროპორტში აიღონ, შევიდნენ ქვეყანაში და დარჩნენ 30 დღის განმავლობაში", -განმარტა ეკატერინე მაიერინგ-მიქაძემ.

ელჩის თქმით, ამის შესახებ მოლაპარაკებები დიდი ხნის განმავლობაში მიმდინარეობდა, საბოლოოდ შეთანხმება შედგა და საქართველო იმ 30 ქვეყანას შეუერთდა, რომლებთანაც კატარს გამარტივებული სავიზო რეგულაციები აქვს.

"დაახლოებით 2012 წლიდან და მანამდეც ვთხოვდით, განეხილათ ეს საკითხი. გვპირდებოდნენ და დადგა ის მომენტი, როდესაც კატარის შს სამინისტროსთან შეხვედრისას ჩვენ კიდევ ერთხელ დავაყენეთ ეს საკითხი. სადღაც ორ საათში უკვე გადაეგზავნა ყველა ტურისტულ სააგენტოს კატარში და აგრეთვე საიმიგრაციო დეპარტამენტებს შეტყობინება, რომ ქართველებს შეუძლიათ, შემოსვლა დოჰაში" -აღნიშნა ელჩმა.

მისივე თქმით, არსებობს კონკრეტული რეგულაციებიც, კერძოდ კატარის სახელმწიფოში მოსახვედრად საჭიროა: მოქმედი პასპორტი, ორივე მიმართულების ბილეთი, სასტუმროს ჯავშანი და1500 დოლარის ოდენობის ნაღდი თანხა ან იგივე რაოდენობა საკრედიტო ბარათზე.

აეროპორტში კი, საქართველის მოქალაქეს, სხვების მსგავსად, ვიზის მოსაკრებლის - 100 კატარული რიალის გადახდა მოუწევს, რაც დაახლოებით 34 აშშ დოლარია.

ამასთან, ეკატეტინე მაიერინგ-მიქაძის თქმით, კატარის სახელმწიფოსთვის არაბული ქვეყნების მიერ გამოცხადებული ბოიკოტის შემდეგ, საქართველომ კატარის ბაზარის სასარგებლოდ გამოიყენება შეძლო და იქ სურსათი გაიტანა. იგეგმება ბაზარზე სამშენებლო მასალის გატანაც.