თურქეთი და თურქეთის მოსახლეობა არ დაემორჩილება მუქარასა და შანტაჟს – ამის შესახებ თურქეთის საგარეო საქმეთა მინისტრმა მევლუთ ჩავუშოღლუმ გერმანიის მთავრობის მხრიდან გაკეთებული კრიტიკული განცხადებების პასუხად განაცხადა.
მევლუთ ჩავუშოღლუს თქმით, გერმანიის საგარეო საქმეთა მინისტრის მიერ გაკეთებული განცხადებები არ შეესაბამება ორი ქვეყნის მეგობრულ დამოკიდებულებას და წლების განმავლობაში არსებულ თანამშრომლობას.
„გერმანიის მიერ გაკეთებული განცხადებები, რომელიც თავშესაფარს აძლევს „ქურთისტანის მუშათა პარტიისა“ და ფეთჰულაჰ გიულენის ორგანიზაციის ტერორისტებს, მიუღებელია და ორმაგი სტანდარტების პოლიტიკას ასახავს“, - აღნიშნა თურქეთის საგარეო უწყების ხელმძღვანელმა.
20 ივლისს გერმანიის საგარეო საქმეთა მინისტრმა ზიგმარ გაბრიელმა განაცხადა, რომ თურქეთში უფლებადამცველების დაკავების გამო, გერმანია ოფიციალურ ანკარასთან ეკონომიკურ ურთიერთობებს, საკრედიტო და საინვესტიციო პროგრამებს გადახედავს.