ვენესუელაში ანტისამთავრობო აქციების დროს მომხდარი შეტაკებების შედეგად ორი ადამიანი დაიღუპა.

ქვეყნის პროკურატურა ოფიციალურად ადასტურებს, რომ 24 წლის რონი ტეჰერი აქციის დროს მიყენებული ჭრილობით გარდაიცვალა. აქციის მეორე მსხვერპლი 23 წლის ანდრეს უსკატეგია, რომელიც ბარიკადების აღებისას პოლიციასთან დაპირისპირების დროს გარდაიცვალა.

ადგილობრივი მედიის ინფორმაციით, არიან დაშავებულებიც, მათგან ათის მდგომარეობა მძიმეა.

ოპოზიცია აცხადებს, რომ მათ მიერ ორგანიზებული 24-საათიანი გაფიცვა წარმატებული აღმოჩნდა. ოპოზიციის ინფორმაციით, საყოველთაო გაფიცვაში ქვეყანაში მომუშავე კომპანიების 80% შეუერთდა.

ანტისახელისუფლებო აქციები ვენესუელაში მარტის შემდეგ მიმდინარეობს.