საქართველოს ეროვნული საკალათბურთო ნაკრები სლოვენიის დაბა პოდჩეტრტეკში ევროპის ჩემპიონატისთვის მზადებას აგრძელებს.

სრული დატვირთვით ვერ ვარჯიშობს ბექა ბურჯანაძე, რომელსაც ტრავმის შემდგომ რეაბილიტაციას გადის. საერთო ჯგუფს შეუერთდა ეროვნული ნაკრების ერთ-ერთი ლიდერი თორნიკე შენგელია.

სლოვენიურ შეკრებაზე 20-წლამდელთა ნაკრების წევრი გოგა ბითაძე 24 ივლისს გამოცხადდება, ხოლო კაპიტანი ზაზა ფაჩულია სანაკრებო ვარჯიშებში აგვისტოს დასაწყისში, ნაკრების თბილისში დაბრუნების შემდეგ ჩაერთვება.

საქართველოს ეროვნული ნაკრების საწვრთნელი შეკრებიდან კალთბურთის ფედერაციის „ფეისბუქ“ გვერდზე პირდაპირი ჩართვა განხორციელდა. გულშემატკივრების კითხვებს ეროვნული ნაკრებისა და მალაგის „უნიკახას“ ცენტრმა, გიორგი შერმადინმა უპასუხა.

„თითოეული ჩვენგანი იმაზეა ორიენტირებული, რომ ევროპის ჩემპიონატის ჯგუფური ეტაპი გადავლახოთ. დასვენების შემდეგ ჯერ საუკეთესო ფორმაში არავინაა, მაგრამ ვიმედოვნებ, რომ სექტემბრამდე პირადად იმ კონდიციებში შევალ, რომელიც ევროპის ჩემპიონატზეა საჭირო. სამწუხაროა, რომ ვიქტორ სანიკიძე გამოგვაკლდა. ის ერთ-ერთი საუკეთესო მოთამაშეა ნაკრებშიც და ევროპაშიც. მისი დანაკლისის შევსება რთული იქნება, მაგრამ სხვა გზა არაა. მალე ზაზა ფაჩულია შემოგვიერთდება და მზადებას მთელი ძალებით დავიწყებთ. მჯერა, ჩვენი თითოეული მოთამაშე საქმეს ბოლომდე გააკეთებს და ნებისმიერ მეტოქესთან ვიბრძოლებთ“ - ამბობს შერმადინი.