თბილისის მერმა დავით ნარმანიამ ასათიანის ქუჩაზე მიმდინარე სარეაბილიტაციო სამუშაოები დაათვალიერა.

წყალსადენისა და წყალარინების ქსელის რეაბილიტაციას „ჯორჯიან უოთერ ენდ ფაუერი“ ახორციელებს.

როგორც ცნობილია, ქუჩაზე წყალსადენის მაგისტრალური ქსელის და განშტოებების 240 გრძივი მეტრი იცვლება ახლით. პარალელურად, წყალმომარაგების გაუმჯობესების მიზნით, 7 ახალი ჩამკეტ-მარეგულირებელი ურდული მონტაჟდება. წყალსადენის ახალ ქსელზე 7 საკვანძო-სათვალთვალო ჭა მოეწყობა.

დედაქალაქის მერის განცხადებით, თბილისს მალე კეთილმოწყობილი ქუჩა შეემატება.
„ასათიანის ქუჩაზე ძალიან მნიშვნელოვანი სამუშაოები მიმდინარეობს. წლების განმავლობაში ეს ქუჩა იყო ძლიერ დაზიანებული. ძალიან მასშტაბური კაპიტალური სამუშაოები მიმდინარეობს. მოეწყობა ბორდიურიც, ტროტუარი და ა.შ. ძალიან კარგად კეთილმოწყობილი ქუჩა შეემატება ჩვენს დედაქალაქს",-განაცხადა ნარმანიამ.


ამასთან, წყალარინების ქსელის 100 გრძივი მეტრი იცვლება ახლით, რომელზეც განახლდება სათვალთვალო ჭები.
სარეაბილიტაციო სამუშაოები აგვისტოს დასაწყისში დასრულდება.ასფალტის ახალ საფარს გამგეობა დააგებს.