ე.წ. ციანიდის საქმეზე სოსო ოხანაშვილის დაკითხვას ადვოკატები 14:00 საათზე „სკაიპის“ მეშვეობით გეგმავენ, - ამის შესახებ მიხეილ რამიშვილმა განაცხადა და აღნიშნა, რომ დაკითხვის უზრუნველყოფისთვის დაცვის მხარე მზად არის. რაც შეეხება პროკურორებს, მათ განაცხადეს, რომ ოხანაშვილთან დაკავშირება სცადეს, თუმცა ოჯახის წევრებმა განმარტეს, რომ ის ჩვენებაზე უარს ამბობს.
პროკურორის თქმით, თუკი დღეს ოხანაშვილის დაკითხვას პროცესზე დაცვის მხარე უზრუნველყოფს, ისინი მზად არიან, დაკითხვაში მონაწილეობა მიიღონ. გარდა ამისა, მათი თქმით, პროცესზე დაიკითხება დეკანოზის მეგობარი, რომელიც ბრალდებულმა დაკავებამდე ცოტა ხნით ადრე ნახა და როგორც ზვიად გუბელაძე ამბობს, ამ მოწმეს ბრალდებულმა გარკვეული სახის ნივთები გადასცა.
"აღნიშნული მეგობარი დეკანოზმა ვიდრე დააკავებდნენ მანამდე ნახა. ის ბრალდებულს საპატრიარქოს შესახებ სტატიების მომზადებაში ეხმარებოდა. რაც შეეხება სოსო ოხანაშვილს, ჩვენ ვცადეთ მასთან დაკავშირება, თუმცა ჩვენების მიცემაზე უარს აცხადებს. სოსო ოხანაშვილი ბრალდებულის უახლოესი მეგობარია და ჩვენ მასთან ბევრი კითხვას გვაქვს. გარდა ამისა, ვკითხავთ, თუ რატომ განაცხადა პროკურატურისთვის ჩვენების მიცემაზე უარი", - განაცხადა ზვიად გუბელაძემ.