მოსახლეობის ცნობიერების ამაღლების მიზნით, საქართველოში ჰეპატიტების მსოფლიო დღისადმი მიძღვნილი კვირეული გაიხსნა.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განმარტებით, გზავნილი, რომ C ჰეპატიტი განკურნებადია, თითოეულ ადამიანამდე უნდა მივიდეს.

„კვირეულის მიზანია, ერთის მხრივ მოსახლეობის ინფორმირებულობის ამაღლება და მეორეს მხრივ, აქტიურ სკრინინგში მოსახლეობის ფართო მასების ჩართვა. ქვეყანაში 150 ათასამდე ადამიანია, რომელსაც ქრონიკული C ჰეპატიტის ინფექცია აქვს და უმრავლესობამ, დაახლოებით 100 ათასმა, არ იცის ეს, რადგან ეს ე.წ. ჩუმად განვითარებადი დაავადებაა.

ამიტომ, ეს ადამიანები ჰეპატიტის სკრინინგ ცენტრებში უნდა მოვიწვიოთ იმისთვის, რომ თავის სტატუსი გაიგონ. მოსახლეობას საშუალება ეძლევა ქვეყნის მასშტაბით 100 წერტილში კიდევ უფრო მეტი ადამიანი მივიდეს. კვირეულის ფარგლებში სკრინინგ ცენტრები გახსნილი იქნება. გასულ კვირას ყველაზე უფრო მოწყვლად ფენას 30-დან 60 წლამდე მამაკაცებს მოკლე ტექსტური შეტყობინებები დავუგზავნეთ. მოსახლეობის მეტი ინფორმირებისთვის ამ შეტყობინებების გაგზავნა პერიოდულად კვლავ გაგრძელდება, რათა მობრძანდნენ და პროაქტიურად ჩავიტაროთ სკრინინგი. ვისაც C ჰეპატიტი აქტიურ ფაზაში ექნება, მკურნალობა უფასოდ, უახლესი გენერაციის ანტი ვირუსული პრეპარატებით ჩაიტაროს, რომლის განკურნების ეფექტი დაახლოებით 98%-ია",- განაცხადა გამყრელიძემ.

მსოფლიოში B და C ჰეპატიტების ქრონიკული ფორმით 325 მილიონ ადამიანამდეა დაავადებული. 2015 წელს ამ დაავადებით დაახლოებით 1,34 მილიონი ადამიანი გარდაიცვალა. საქართველო C ჰეპატიტის მაღალი გავრცელების ქვეყანას მიეკუთვნება. დაავადებათა კონტროლის ეროვნული ცენტრის მიერ 2015 წელს ჩატარებული კვლევის მიხედვით C ჰეპატიტი საქართველოს ზრდასრული მოსახლეობის 5,4 %-ს, 150 ათასამდე ადამიანს აქვს. ინფიცირებულ ადამიანთა დაახლოებით 70 %-ს სიმპტომები არ უვლინდება და ამის გამო, 100 000-ზე მეტმა ადამიანმა არ იცის, რომ ინფიცირებულია.

ჰეპატიტების მსოფლიო დღე 28 ივლისს აღინიშნება.