„ევროპული საქართველოს“ წევრი, დეპუტატი ოთარ კახიძე აღმაშენებლის გამზირზე მდებარე პოლიციის განყოფილებაში გამოკითხვაზე გამოცხადდა. ის რამდენიმე დღის წინ, აქციაზე იარაღით მისვლის ფაქტთან დაკავშირებით გამოიკითხება.

დეპუტატი აღიარებს, რომ მანიფესტაციაზე იარაღით მისვლა მისი შეცდომა იყო და ამბობს, რომ პოლიცია კანონის შესაბამისად ახდენს რეაგირებას.

„მე, როგორც კანონმორჩილი მოქალაქე, მივედი გამოკითხვაზე და პოლიციას მივაწვდი ინფორმაციას. რაც შეეხება მტკიცებულებებს, მტკიცებულება არის მხოლოდ ჩემს მიერ მიწოდებული ინფორმაცია და მე, რა თქმა უნდა, ვიტყვი სიმართლეს, რაც რეალურად იყო. იარაღი ნამდვილად ცეცხლსასროლი იყო, კანონიერად გაფორმებული", - განაცხადა კახიძემ განყოფილებაში შესვლის წინ.

დეპუტატის თქმით, იცოდა, რომ მანიფესტაციაზე იარაღით მისვლა კანონდარღვევა იყო.

„წინადედულობა უნდა გამომეჩინა. მანქანაში ვერ დავტოვე, მძღოლთან ერთად არ ვიყავი, მანქანაში დატოვება სარისკოა, შეიძლება გატეხონ, თუმცა ეს იყო ნამდვილად შეცდომა, რომელიც დავუშვი", - განუცხადა ჟურნალისტებს გამოკითხვაზე შესვლამდე ოთარ კახიძემ.

პოლიციის სამმართველოში დეპუტატი იარაღის გარეშე მივიდა.

როგორც საზოგადოებრივს შსს-ს პრესსამსახურში განუცხადეს, თბილისის მთავარი სამმართველოს ძველი თბილისის პოლიციის სამმართველომ ადმინისტრაციული სამართალწარმოება დაიწყო ადმინისტრაციულ სამართალდარღვევათა კოდექსის 174 პრიმა მუხლისა და 239 მუხლის მე-13 ნაწილის საფუძველზე.

შსს-ს პრესსამსახურში აცხადებენ, რომ დეპუტატის გამოკითხვის შემდეგ, შედგება ოქმი, რომელიც სასამართლოში გადაიგზავნება. საქმეზე საბოლოო გადაწყვეტილებას სწორედ სასამართლო მიიღებს.