კონსტიტუციაზე კონსენსუსი მიღწეული უნდა იყოს საქართველოს პოლიტიკურ ძალებს შორის - ამის შესახებ ნათქვამია ვენეციის კომისიის პრეზიდენტის წერილში. ჯანი ბუკიკიომ განცხადება ქართული ოპოზიციური პარტიების მიმართვის საპასუხოდ გამოგზავნა.
ვენეციის კომისიის პრეზიდენტის მიერ ხელმოწერილ წერილში აღნიშნულია, რომ “კომისია საკუთარ პოზიციაზე რჩება და გამოსავალი ნაპოვნი უნდა იყოს დიალოგის გზით, რომ მხარეებმა კონსენსუსს მიაღწიონ.
ამავდროულად, ის უნდა ეფუძნებოდეს ვენეციის კომისიის შეხედულებას. კომისიის როლი ვერ იქნება სპეციფიკური გამოსავლის მოძებნაში“,- აღნიშნულია ჯანი ბუკიკიოს წერილში.
15-მა პარტიამ კომისიას 3 დღის წინ შეატყობინა, რომ ხელისუფლება დიალოგის ჩაშლას ცდილობს. ვენეციის კომისიისადმი მიმართვის ავტორთა შორის არიან როგორც საპარლამენტო, ასევე არასაპარლამენტო პარტიები.
როგორც ოპოზიციაში ამბობენ, ეს წერილი ვენეციის კომისიის ინფორმირებას ისახავდა მიზნად. მიმართვაში ნათქვამია, რომ პროცესი ჩიხში შედის, რადგან მმართველი გუნდი არ აპირებს ოპოზიციასთან საუბარს და ვენეციის კომისიის რეკომენდაციის მიუხედავად, უმრავლესობამ მომდევნო საპარლამენტო არჩევნებზე ისევ შერეული სისტემის ინიცირება მოახდინა და ორი მოსმენით დაამტკიცა.