გემი, რომელსაც აშშ-ის ტექნიკის ნაწილი მრავალეროვნული სწავლება "ღირსეული პარტნიორი 2017"-სთვის მოაქვს, ფოთის პორტში შემოვიდა. ამის შემდეგ ტექნიკის გადმოტვირთვა დაიწყება, შემდეგ კი სამხედრო ტექნიკა ვაზიანის პოლიგონისკენ დაიძვრება.
მრავალეროვნული სწავლება Noble Partner 2017-ს საქართველოს შეიარაღებული ძალები და აშშ-ის არმიის ევროპული სარდლობა ვაზიანის პოლიგონზე მესამედ ჩაატარებს.
საერთაშორისო სწავლებაში მონაწილეობას საქართველოს შეიარაღებული ძალების სახმელეთო ჯარების აღმოსავლეთ სარდლობის ქვედანაყოფები, აშშ-ის არმიის ევროპული სარდლობის სამხედრო მოსამსახურეები, დიდი ბრიტანეთის სადესანტო ასეული, გერმანიის ბუნდესვერის მექანიზებული ოცეული და უზრუნველყოფის ჯგუფი, უკრაინის ერთი ქვეითი ოცეული, სომხეთის სამედიცინო ასეული (საველე ლაზარეთი), სლოვენიის ქვეითი ოცეული. თურქეთის შეიარაღებული ძალებიდან მონაწილეობას ოთხი ოფიცერი მიიღებს.