„ბავშვთა სამყაროს“ ხანძრის შედეგად დაზარალებულები დღეს, მთავარ პროკურატურასთან კიდევ ერთხელ შეიკრიბნენ. როგორც მათი უფლებადამცველი აცხადებს, გამოძიებას პასუხისმგებელი სუბიექტი დღეს უნდა დაესახელებინა.თუმცა, როგორც პროკურორები აცხადებენ, დამნაშავის გამოვლენა ბიუროკრატიული პროცესების გამო გადაიდო.

აქციის წევრები გამოძიების დროულ დასრულებას, დამნაშავე პირის გამოვლენასა და სისხლის სამართლის კოდექსით პასუხისმგებლობაში მიცემას მოითხოვენ. დაზარალებულები ზარალის ანაზღაურებასთან ერთად, ამ დროისთვის, სესხების შეჩერებას ითხოვენ. ასევე, უცვლელი რჩება მთავარი პროკურორის გადადგომის მოთხოვნაც.

ამასთან, ორთაჭალაში, მთავარ პროკურატურასთან, „ბავშვთა სამყაროს“ მოვაჭრეების პარალელურად, ადმინისტრაციისაა და სააქციო საზოგადოების წევრებიც შეიკრიბნენ. ადგილზე მობილიზებული იყო სამართალმდამცავები, რომლებმაც პროვოკაციებისა და დაპირისპირების თავიდან არიდების მიზნით, ადმინისტრაციისა და სააქციო საზოგადოების წევრები იუსტიციის სამინისტროსთან გადაიყვანეს.

„ბავშვთა სამყაროს“ დირექტორის, გიორგი მაჭავარიანის თქმით, ისინი მთავარი პროკურატურისგან გამოძიების დროულ დასრულებას ითხოვენ. როგორც დირექტორმა განაცხადა, ექსპერტების დასკვნით ადმინისტრაციისა და სააქციო საზოგადოების ზარალი 18 940 ლარად შეფასდა. შენობა კი, მათ 6 მლნ. ლარად ჰქონდათ დაზღვეული.

მაჭავარიანის თქმით, ლოგიკურად შეუძლებელია „ბავშვთა სამყაროში“ ხანძრის გამჩენი მათი მხირდან იყოს, რადგან დაზღვევის თანხა ბევრად აღემატება მიყენებულ ზარალს.

„ბავშვთა სამყაროს“ ადმინისტრაცია და სააქციო საზოგადოების წარმომადგნლები გამოძიების დროულ დასრულებასთან ერთად, ყადაღის მოხსნასა და ტერიტორიაზე დემონტაჟის გაგრძელების უფლებასაც ითხოვენ.