საქართველოს პრემიერ-მინისტრმა გიორგი კვირიკაშვილმა შეერთებული შტატების ვიცე-პრეზიდენტის დაგეგმილი ვიზიტის მნიშვნელობაზე ისაუბრა. მაიკ პენსი საქართველოს 31 ივლისს ეწვევა. კვირიკაშვილის განმარტებით, ვიცე-პრეზიდენტის ვიზიტი შეერთებული შტატების მხარდაჭერის დადასტურებაა. მთავრობის მეთაურმა აღნიშნა, რომ რამდენიმე დღეში მრავალმხრივი სამხედრო სწავლება იწყება, რომელშიც საქართველოს პარტნიორი ქვეყნების შეიარაღებული ძალების წარმომადგენლები მონაწილეობენ, რაც რეგიონში სტაბილურობის განმტკიცებას შეუწყობს ხელს.