„ევროპული საქართველოს“ თბილისის მერობის კანდიდატმა ელენე ხოშტარიამ ერისთავის მეორე ჩიხის მოსახლეობას, რომელთა დიდი ნაწილი სოციალურად დაუცველია, პარტიის განახლებული სოციალური პროგრამა გააცნო. ელენე ხოშტარია არჩევნებში გამარჯვების შემთხვევაში თბილისის მერიის ბიუროკრატიული ხარჯების 200 მილიონი ლარით შემცირებას გეგმავს. დაზოგილი თანხებით იგეგმება 203 ათასი პენსიონერისთვის პენსიის 50 ლარით მომატება, სოციალურად დაუცველი ოჯახებისთვის დახმარების 520 ლარამდე გაზრდა.

თანხების შემცირებას მერობის კანდიდატი ისეთი პროგრამების საფუძველზე გეგმავს, როგორიცაა თბილისის მერიის თანამშრომლებისთვის დახვეწილობის კურსების გაუქმება, რითიც ბიუჯეტში 10 000 ლარი დაიზოგება. ხოშტარიას თქმით, 8 მილიონამდე ლარს დაზოგავენ სამთავრობო „ჯიპებისთვის“ თანხის გამოყოფაზე უარის თქმით, გაუქმდება წინასაარჩევნო პიარიათვის გამოყოფილი თანხაც, რაც 450 ათას ლარს შეადგენს. ასევე, იგეგმება მივლინებების, რბილი ავეჯისა და რესტორნებისათვის გათვალისწინებული ხარჯების შემცირება.