ამერიკის შეერთებული შტატების პრეზიდენტი დღეს ესტონეთში ჩავიდა. ბალტიისპირეთის ამ ქვეყნიდან იწყება პენსის ტურნე, რომლის ფარგლებშიც ის საქართველოს და მონტენეგროსაც ესტუმრება.
როგორც დასავლური მედია წერს, პენსის ვიზიტის მთავარი მიზანი ამ ქვეყნების და ზოგადად, ევროპელი მოკავშირეების გამხნევება და მათთვის მხარდაჭერის გამოცხადებაა.
როგორც ვაშინგტონ პოსტი წერს, ვიცე-პრეზიდენტი უსაფრთხოებასთან ერთად აქცენტს ამერიკული ინვესტიციების გაზრდისა და ამ ქვეყნებთან სავაჭრო ურთიერთობების გაღრმავებაზეც გააკეთებს.
გერმანული დოიჩე ველე წერს, რომ მაიკ პენსის ვიზიტი იქნება მტკიცე მხარდაჭერის გზავნილი იმ ქვეყნებისთვის, რომლებსაც რუსეთთან საერთო საზღვარი აქვთ და მოსკოვისგან ზეწოლას განიცდიან.
ალ ჯაზირას ცნობით, პენსი ესტონეთში ვიზიტისას ამ ქვეყნის ტერიტორიაზე ამერიკული საჰაერო თავდაცვითი სისტემების განლაგებას მიესალმება. გამოცემა წერს, რომ ვიცე-პრეზიდენტის მიზანია, კიდევ ერთხელ გაუსვას ხაზი რუსეთის მხრიდან მომავალ აგრესიას.
მაიკ პენსის ვიზიტამდე ერთ დღით ადრე შეერთებული შტატებისა და საქართველოს მიერ ერთობლივად გამართულ წვრთნებზე ამახვილებს ყურადღებას ბრიტანული BBC-ი.