საკრებულოს ფრაქცია „ნაციონალური მოძრაობა“ მერის მოადგილეს, გიგა ნიკოლეიშვილსა და ადმინისტრაციის უფროსს, ირაკლი ჭინჭარაულს ხუთშაბათს, 12:00 საათზე ფრაქციის სხდომაზე იბარებს.

დეპუტატ მარიკა დათუკიშვილის თქმით, დედაქალაქის მერიის სხვადასხვა სტრუქტურაში მუდმივად ხდებოდა ასობით ადამიანის დასაქმება და მერიის მაღალჩინოსნებს კი აღნიშნულ საკითხთან დაკავშირებით, პასუხები არ გაუციათ.

„თუ მერის მოადგილე და ადმინისტრაციის უფროსი არ მოვლენ „ნაციონალური მოძრაობის“ ფრაქციის სხდომაზე, მაშინ ოპოზიცია სასამართლოს მიმართავს. გასული კვირის განმავლობაში საზოგადოებისთვის ერთი განკარგულებითა და ერთი ხელის მოწერით გახდა ცნობილი რამდენიმე ასეული ადამიანის დასაქმების შესახებ თბილისის მერიის სხვადასხვა სტუქტურებში. თბილისის მერიის არც ერთ მაღალჩინოსანს ამასთან დაკავშირებით განცხადება არ გაუკეთებია. ჩვენ მხოლოდ ვნახეთ მერიის წერილობითი განცხადება, სადაც უსუსურ და უარგუმენტო თავის მართლებას ჰქონდა ადგილი. უახლოესი თვეების განმავლობაში შრომითი ხელშეკრულებით მუდმივად ხდებოდა ადამიანების დასაქმება“, - განაცხადა დათუკიშვილმა.

მისი თქმით, საკრებულოს დეპუტატებს ორგანული კანონის თანახმად, კანონმდებლობით დადგენილი წესით უფლება აქვთ ისარგებლონ ნებისმიერი ინფორმაციით, რომელიც უფლებამოსილების განსახორციელებლად აუცილებელია.

„უამრავ კითხვაზე პასუხის გაცემისთვის თბილისის რეგლამენტის თანახმად ვიბარებთ ჩვენ ფრაქცია „ნაციონალური მოძრაობის“ სხდომაზე თბილისის მერის მოადგილეს გიგა ნიკოლეიშვილს, რომელიც გახლავთ კურატორი ადმინისტრაციულ საკითხებში და ადმინისტრაციის უფროსს ირაკლი ჭინჭარაულს. ისინი ვალდებულები არიან საკრებულოს ფრაქციის მოთხოვნის შემთხვევაში გამოცხადდნენ საკრებულოში და პასუხი გასცენ სხდომაზე დასმულ კითხვებს. ხუთშაბათს 12:00 საათზე ბატონ ნიკოლეიშვილს და ბატონ ჭინჭარაულს ვიბარებთ ფრაქციის სხდომაზე და გაგვცენ ყველა მნიშვნელოვან კითხვაზე პასუხი“, - განაცხადა მარიკა დათუკიშვილმა.

მივლენ თუ არა საკრებულოს ფრაქცია „ნაციონალური მოძრაობის“ სხდომაზე დედაქალაქის მერის მოადგილე და ადმინისტრაციის უფროსი, თბილისის მერიაში ჯერჯერობით კომენტარს არ აკეთებენ.