მაიკ პენსის ჩამოსვლას, შეერთებული შტატების მხარდაჭერის დადასტურებად აფასებენ ექსპერტები და აცხადებენ, რომ ვიზიტი ორი ქვეყნის ურთიერთობას ახალ ეტაპზე გადაიყვანს.
აღმოსავლეთ ევროპის მიმართულებით ამერიკის ინტერესების განსაზღვრისას, საქართველო ის სახელმწიფოა, რომელსაც ძალიან სერიოზული მნიშვნელობა ენიჭება - ასე აფასებს ტრამპის ადმინისტრაციის უმაღლესი წარმომადგენლის ჩამოსვლას საქართველოს უსაფრთხოებისა და განვითარების ცენტრის დირექტორი ლევან დოლიძე. მისი თქმით, პენსის ვიზიტის შეფასებისას მნიშვნელოვანია აშშ-ის ვიცე-პრეზიდენტის დაგეგმილი ტურნეს მიმართულებების გათვალისწინება, კერძოდ ვიზიტი ესტონეთში, საქართველოში და მონტენეგროში.
ამერიკისმცოდნეობის ინსტიტუტის ხელმძღვანელი ვასილ კაჭარავა კი განმარტავს, რომ მაიკ პენსი დონალდ ტრამპის პარტნიორი, თანამოაზრე და თანამებრძოლია და საქართველოში აშშ-ის პრეზიდენტის გზავნილი მოაქვს.