საქართველოს პრემიერ-მინისტრი გიორგი კვირიკაშვილი, მეუღლესთან ერთად, აშშ-ის ვიცე-პრეზიდენტ მაიკ პენსსა და ამერიკის დელეგაციას ოფიციალურ ვახშამზე უმასპინძლა. კვირიკაშვილმა და პენსმა ვახშამზე სადღეგრძელოები წარმოთქვეს. ვახშამზე ანსამბლმა „რუსთავმა“ „ჩაკრულო“ შეასრულა.

„მინდა მოგასმენინოთ პოლიფონიური ფოლკლორული სიმღერა „ჩაკურულო“, რომელიც ნასა-ს პროგრამაში „ვოიაჯერის“ მისიით 40 წლის წინ გაგზავნილია კოსმოსში. ექსპედიაციას კარლ სეიგანი ხელმძღვანელობდა. მან მიიღო გადაწყვეტილება, თუმცა მოსკოვიდან დაურეკეს და უთხრეს, რომ საქართველო არ იყო დამოუკიდებელი ქვეყანა და შესაბამისად, ქართული სიმღერა ვერ მოხვდებოდა მსოფლიო კულტურული მემკვიდრეობის სიაში. ზეწოლის მიუხედავად, მან გადაწყვიტა, „ჩაკრულო“ ოქროს ფირფიტების სიაში ​მოხვედრილიყო. ​​ამჟამად, შატლი, რომელიც ქართულ-ამერიკული მეგობრობის სიმბოლოა, გავიდა მზის სისტემიდან და უსასრულობისკენ მიემართება. ქართულ-ამერიკული მეგობრობის უსასრულობის, მარადიულობის ნიშნად​, მოვიწვიეთ გუნდი, რომელიც ამ სიმღერას შეასრულებს“, - ასე წარუდგინა ამერიკელს სტუმარს პრემიერმა ქართული სიმღერა.  

ვახშმამდე, სტუმრებმა ფუნიკულიორიდან თბილისის ხედები დაათვალიერეს და ერთობლივი სამახსოვრო ფოტო გადაიღეს. მხარეებმა ასევე გაცვალეს საჩუქრები. პრემიერ-მინისტრმა აშშ-ის ვიცე-პრეზიდენტს საქართველოს ისტორიის ამსახველი ფოტოგამოფენა დაათვალიერებინა.