საქართველოში დატვირთული დღის წესრიგით ჩამოვიდა ამერიკის ვიცე-პრეზიდენტის მეუღლე კარენ პენსიც. მისი პროგრამა ფსიქო-სოციალური რეაბილიტაციის ცენტრის „კამარას“ პაციენტებთან და თერაპევტებთან შეხვედრით დაიწყო.
კარენ პენსი არტთერაპიაში ჩართული 5 ბენეფიციარის ნამუშევრებს გაეცნო და მათთან სამახსოვრო ფოტოები გადაიღო.
ფსიქოთერაპიის მეთოდით, რომელიც შემოქმედებითი თვითგამოხატვის გზით პაციენტებს რეაბილიტაციაში ეხმარება ამერიკის მეორე ქალბატონი 2006 წელს დაინტერესდა და მას შემდეგ მსოფლიოში არტთერაპიის დამკვიდრებასა და განვითარებას აქტიურად უჭერს მხარს.
ამერიკის ვიცე-პრეზიდენტის მეუღლემ ფსიქო-სოციალური ცენტრის დამფუძნებელ ნათია ფანჯიკიძესთან და ცენტრის თერაპევტებთან დისკუსიაც გამართა. რის შემდეგაც თბილისის ისტორიის მუზეუმში ქართველი მხატვრის ოლესია თავაძის პერსონალური ექსპოზიცია დაათვალიერა.
50 გრაფიკული და ფერწერული ტილო ავტორმა მეოცე საუკუნის ერთ-ერთი ყველაზე ცნობილი ამერიკელი პოეტის, პულიცერის 4 პრიზის მფლობელის რობერტ ლი ფროსტის შემოქმედებით შთაგონებულმა შექმნა და „ჩემი რობერტ ფროსტი“ დაარქვა.