თბილისის მერობის კანდიდატი, ალეკო ელისაშვილი გამარჯვების შემთხვევაში „სითი პარკისთვის'' ხელშეკრულების გაუქმების პირობას დებს. ალეკო ელისაშვილმა სპეციალური პრეს-კონფერენცია „სითი პარკის“ ოფისთან გამართა და საკუთარ გეგმებზე ისაუბრა.

„სითი პარკი“ პარკირების მონოპოლისტია თბილისში. წინა ხელისუფლებამ საშინელი კონტრაქტი გააფორმა ამ კომპანიასთან. ახალმა ხელისუფლებამ წაუყრუა ამ კონტრაქტს და „სითი პარკის'' არსებობას არ იმჩნევს. ათი წლის განმავლობაში კომპანიას თითქმის 300 მილიონი ლარი აქვს ჩვენი ჯიბეებიდან ამოღებული და სანაცვლოდ ერთი საპარკინგე ადგილიც არ შეუქმია თავისი ხარჯით. დახაზა ტროტუარები, დახაზა ქუჩები და ფული მხოლოდ ევაკუატორის ყიდვაში დახარჯა. „სითი პარკი“ არის საშინლად უპასუხისმგებლო კომპანია, რომელსაც ყველა ხელისუფლება ელოლიავება, არა და კონტრაქტის მიხედვით, ეს კომპანია უნდა დარჩეს 2025 წლამდე, რაც ქალაქისთვის კოშმარი იქნება. ჩემი გარჯვების შემთხვევაში, პირველი რასაც ხელს მოვაწერ „სითი პარკის“ თბილისიდან გაშვების განკარგულება იქნება",- აღნიშნა ელისაშვილმა.

მისივე თქმით, ამის შემდეგ საერთაშორისო ტენდერი უნდა გამოცხადდეს, რომელსაც სამი პირობა ექნება. პირველი - ხელშეკრულების დარღვევის გამო „სითი პარკისთვის“ ჯარიმა თავად ახალმა კომპანიამ გადაიხადოს. მეორე -საპარკინგე ინფრასტრუქტურის შექმნა, მესამე - პარკინგის სისტემის მოწესრიგება.