არჩევნებში „ქართული ოცნების“ დასამარცხებლად ოპოზიცია უნდა გაერთიანდეს, - ეს განცხადება „ახალი საქართველოს“ ლიდერმა გიორგი ვაშაძემ გააკეთა.

მისი თქმით, არა მხოლოდ პოლიტიკური პარტიები, არამედ პროდასავლური, პროგრესული ჯგუფები და საზოგადოების წევრებიც უნდა გაერთიანდნენ.

„არა მარტო პოლიტიკური პარტიები, არამედ პროდასავლური, პროგრესული ჯგუფები და საზოგადოების აქტიური წევრებიც უნდა გაერთიანდნენ. ჩვენს პირველ ინიციატივას, რომელიც გასულ კვირას გვქონდა, ბევრი საინტერესო ადამიანი გამოეხმაურა. დღეს ამ საკითხზე დისკუსია და მსჯელობა გვექნება. იმედი მაქვს, რომ ეს პროცესი შეუქცევადი იქნება და ჩვენ ოქტომბერში ადგილობრივი თვითმმართველობის არჩევნებში „ქართულ ოცნებას“ დავამარცხებთ. სხვა პირობებში ეს მხოლოდ და მხოლოდ ხელისუფლების თამაშია. პრინციპების გარშემო გაერთიანება ერთადერთი გზაა მავნებლური ხელისუფლების დასამარცხებლად“, - განაცხადა ვაშაძემ.

„საქართველოს ევროპული დემოკრატების“ თავმჯდომარის, პაატა დავითაიას განმარტებით, კონსულტაციების შემდეგ არ არის გამორიცხული თვითმმართველობის არჩევნებზე თბილისის მერობის ერთიანი კანდიდატი ჰყავდეთ.

„გიორგი ვაშაძემ განაცხადა, რომ დასავლური ღირებულების ოპოზიციური პარტიების გაერთიანება მოხდეს. არა მარტო თვითმმართველობის არჩევნებისთვის გავერთიანდეთ, არამედ გრძელვადიანი მიზნებისთვის. დღეს დაიწყო კონსულტაციები. სავარაუდოდ, შეთანხმება მოხდება და ჩვენ არჩევნებში ერთად გავალთ. ჩვენთვის მნიშვნელოვანია, საზოგადოებას ვაჩვენოთ, რომ ოპოზიციას გაერთიანების უნარი შესწევს. ცალ-ცალკე თამაში გამოიწვევს იმას, რომ არჩევნები „ქართული ოცნება“ გაიმარჯვებს. რაც ჩვენთვის მიუღებელია. აქედან გამომდინარე, ყველას, ვისაც არჩევნებში გამარჯვება სურს, ერთიანი პლატფორმა უნდა ჩამოყალიბდეს, ძალა რომელიც ხელისუფლებას შეცვლის“, - განაცხადა პაატა დავითაიამ.

ადგილობრივი თვითმმართველობის არჩევნებისთვის გაერთიანების და ერთიანი პლატფორმის შექმნის მიზნით „ახალი საქართველოს“ ოფისში კონსულტაციები მიმდინარეობს. შეხვედრას ოთხი არასაპარლამენტო ოპოზიციური პარტია და საზოგადოების აქტიური წევრების ნაწილი ესწრება.