მიხეილ სააკაშვილის ადვოკატმა ე.წ. პიჯაკების საქმეზე სასამართლო პროცესის განუსაზღვრელი ვადით გადადება მოითხოვა. დაცვის მხარის განცხადებით, საქართველოს ყოფილ პრეზიდენტს ამ დროისათვის არ გააჩნია არცერთი ქვეყნის მოქალაქეობა, ის ვერ კვეთს ამერიკის შეერთებული შტატების საზღვარს, სადაც ამ დროისათვის იმყოფება და აქედან გამომდინარე, ბრალდებული საკუთარ უფლებებს სრულფასოვნად ვერ დაიცავს.
დაცვის მხარის პოზიციას არ იზიარებს ბრალდების მხარე. პროკურორის განმარტებით, ბრალდებული არც ამ დრომდე დასწრებია სასამართლო განხილვებს და ეს არგუმენტი არ უნდა იყოს ხელისშემშლელი პროცესის ჩასატარებლად.
მოსამართლე ბადრი კოჭლამაზაშვილმა დაცვის მხარის შუამდგომლობა არ დააკმაყოფილა და განმარტა, რომ იქნება პირი საქართველოს მოქალაქე, უცხო ქვეყნის თუ მოქალაქეობის არმქონე, ეს სამართალწარმოების პროცესზე გავლენას ვერ მოახდენს.
ე.წ. პიჯაკების საქმეზე საქართველოს ყოფილ პრეზიდენტს და სახელმწიფო დაცვის სპეციალური სამსახურის ყოფილ უფროსს, თეიმურაზ ჯანაშიას პროკურატურა საბიუჯეტო სახსრების გაფლანგვას ედავება.