კომერციული დავების განხილვაზე სპეციალურად შერჩეული ოთხი მოსამართლე იმუშავებს. თბილისის საქალაქო სასამართლოში, სამოქალაქო კოლეგიაში, კომერციული დავების განმხილველი სპეციალური ვიწრო სპეციალიზაცია შეიქმნა.

სპეციალიზაციის შექმნის მიზანი, გაჭიანურებული კომერციული დავებია. იუსტიციის საბჭოს თავმჯდომარის გიორგი მიქაუტაძის განცხადებით, ვიწრო სპეციალიზაციის შექმნისას საბჭომ ბიზნესმენების პრეტენზიები გაითვალისწინა. მისი თქმით, ბიზნესსექტორი გაჭიანურებულ დავებზე აკეთებს აქცენტს.

”ვფიქრობთ, მივიღებთ იმას, რომ უფრო არგუმენტირებულად იქნება განხილული ბიზნესდავები, ასევე გაიზრდება დასაბუთებულობის ხარისხი და შემჭიდროვებულ ვადებში მოხდება მსგავსი დავების განხილვა. ეს ძალიან მნიშვნელივანია, რადგან ძირითადი პრეტენზია და უკმაყოფილება არის სწორედ ამ საკითხთან დაკავშირებით და არის შენიშვნები, რომ დროში იმდენად ხანგრძლივად იწელება ეს საქმეები, რომ საბოლოო ჯამში, აზრს კარგავს ბიზნესსექტორისთვის”,- განმარტა გიორგი მიქაუტაძემ.

მისივე განმარტებით, ვიწრო სპეციალიზაციას განსახილველად გადაეცემა სანივთო, სამეწარმეო, გაკოტრებისა და ვალდებულების სამართლებრივი დავები, რომელთა ღირებულებაც 5000 ათას ლარზე მეტია.

აღნიშნული ვიწრო სპეციალიზაცია, საწყის ეტაპზე დაკოპლექტდება ოთხი მოსამართლით, ესენი არიან: თამარ ბურჯანაძე, ლევან მიქაბერიძე, ლაშა ქოჩიაშვილი და სოსო თურწკაია, თუმცა საბჭოს თავმჯდომარე არ გამორიცხავს, რომ მათი რაოდენობა გაიზარდოს. მისივე თქმით, ეს მოსამართლეები კვალიფიკაციის ასამაღლებელ ტრეინინგებს გაივლიან.

გიორგი მიქაუტაძემ გარკვეულ სტატისტიკაზეც ისაუბრა. მისი ქმით, ასეთი საქმეები, დღეს არსებული მდგომარეობით, 220-მდეა, წლიურად კი 300 საქმემდე შედის განსახილველად. მისივე თქმით, პირველი შედეგი, ვიწრო სპეციალიზაციას ახალი წლისთვის უკვე ექნება.