6 სექტემბერს სტრასბურგში საკონსტიტუციო რეფორმასთან დაკავშირებით დაგეგმილი შეხვედრისთვის საჭირო ტაქტიკაზე 15 კვალიფიციური პარტიისგან შექმნილმა საკოორდინაციო საბჭომ კონსულტაციები დღეიდან დაიწყო.

„ახალი მემარჯვენეების“ ლიდერის მამუკა კაციტაძის განმარტებით, ოპოზიცია 6 სექტემბერს ვენეციის კომისიის მოდერატორობით დაგეგმილ შეხვედრაზე ერთიანი პოზიციით უნდა წარდგეს.

„იმისათვის რომ ხელისუფლებასთან საუბარი პროდუქტიული იყოს საჭიროა, რომ ოპოზიციამ მაქსიმალურად ბევრ საკითხზე დეტალური შეჯერება მოახერხოს. თუმცა იმასაც ვაცნობიერებ, რომ ოპოზიციური პარტიები სხვადასხვა მდგომარეობაში არიან. შესაბამისად, ინტერესებიც შეიძლება სხვადასხვა იყოს, მაგრამ ჩვენ განსხვავებები კი არ უნდა ვეძებოთ ერთმანეთში, არამედ საერთო გადაკვეთის წერტილები უნდა ვეძებოთ და მისი წინ წამოწევა უნდა მოვახდინოთ.

ჩემი აზრით 6 სექტემბრისათვის ეს ტაქტიკაა მოსამზადებელი. სულ რაღაც 2-3 დღის წინ ქართულმა პოლიტიკურმა ოპოზიციამ ის მიიღო რისთვისაც აქამდე ვიბრძოდით და ხელისუფლება არ გვესაუბრებოდა. ჩვენ ვენეციის კომისიის მოდერატორობით 6 სექტემბერს საკონსტიტუციო რეფორმასთან დაკავშირებით კონკრეტული შეხვედრა ჩანიშნული გვაქვს. ხელისუფლებამ გადაწყვიტა, არ ვიცი, ნებით, როგორ თუ რანაირად მაგრამ ოპოზიციასთან ერთად დასხდება და ვენეციის კომისიასთან ერთად ყველა საკითხს გაივლის, რაც საკონსტიტუციო რეფორმას შეეხება და რაც პრინციპულია. ჩვენ მივიღეთ რა ეს დადებითი შედეგი, პროცედურული თუ ეტაპობრივი წარმატება გვინდა 6 სექტემბერს ღირსეულად წარვდგეთ, იმისათვის რომ ერთის მხრივ, პროცესი შედეგიანად დამთავრდეს და მეორე მხრივ, ამ შეხვედრის მარგინალიზაცია არ მოხდეს“, - განაცხადა მამუკა კაციტაძემ.