ქურდული სამყაროს წევრობის ბრალდებით დაკავებულთა დავით და ტარიელ მახარობლიძეების ადვოკატი ტარიელ კაკაბაძე ბრალდებულებისთვის აღკვეთის ღონისძიებად პატიმრობის შეფარდების საკითხს სააპელაციო სასამართლოში აღარ გაასაჩივრებს. როგორც ტარიელ კაკაბაძემ საზოგადოებრივს განუმარტა, დაცვის მხარის სტრატეგიიდან გამომდინარე, ადვოკატი აპირებს სამხილები, რომელიც დაცვის მხარეს აქვს, წინასასამართლო სხდომაზე წარადგინოს.
ადვოკატი განმარტავს, რომ ის მტკიცებულებები, რომელიც დაცვის მხარეს აქვს, ბრალდებულებს ტარიელ და დავით მახარობლიძეებს გაამართლებს.
„იმისათვის, რომ შეიცვალოს აღკკვეთის ღონისძიება, აუცილებელია არსებობდეს ახალი გარემოებები. დაცვის მხარეს ნამდვილად გვაქვს ახალი მტკიცებულებები, რომლებიც საკმაოდ დიდი მნიშვნელობის მქონე მტკიცებულებებია, თუმცა ჩვენი - დაცვის მხარის სტრატეგიიდან გამომდინარე, უმჯობესია, აღნიშნული მტკიცებულებები სასამართლოს წარვუდგინოთ. წინასასამართლო ეტაპზე ჩვენი ყველა მტკიცებულება დასაშვებად იქნება ცნობილი. ჩვენ ასევე დავაყენებთ შუამდგომლობას, მოვითხოვთ აღკვეთის ღონისძიების შეცვლას და რა თქმა უნდა, როდესაც გადავალთ არსებით განხილვაზე, კონკრეტულად დავიწყებთ მტკიცებულებების გამოკვლევას და მოწმეების დაკითხვას, სასამართლო დარწმუნდება, რომ ორივე ბრალდებული - დავით და ტარიელ მახარობლიძე აბსოლუტურად უდანაშაულოა, მათ მიმართ აუცილებლად დადგება გამამართლებელი განაჩენი“ - განაცხადა ტარიელ კაკაბაძემ.
რუსთავში, ქურდული სამყაროს წევრობის ბრალდებით სულ სამი პირი დააკავეს. გამოძიების ინფორმაციით, ისინი კრიმინალური ავტორიტეტისგან, ზაალ მახარობლიძისგან, მეტსახელად „გლეხოვიჩისგან“ იღებდნენ კონკრეტულ დავალებებს. გარდა ამისა, გამოძიების ინფორმაციით, დაკავებული დავით და ტარიელ მახარობლიძეები და გიორგი რეხვიაშვილი რუსთავში ერთ-ერთ ბიზნესმენს ფულს სძალავდნენ.
ბრალდებულებს აღკვეთის ღონისძიების სახით სასამართლომ პატიმრობა შეუფარდა. საქმეზე წინასასამართლო სხდომა 21 სექტემბერს ჩაინიშნა.