ავღანეთში, ყანდაღარის პროვინციაში ნატო-ს შეიარაღებულ ძალებზე თავდასხმის შედეგად ორი ამერიკელი სამხედრო დაიღუპა და ოთხი დაშავდა. ნატო-ს ინფორმაციით, 2 აგვისტოს რადიკალურმა დაჯგუფება თალიბანმა ყანდაღარის პროვინციაში დანაღმული ავტომობილი ააფეთქა.

თავდასხმა დაგმო ალიანსის გენერალურმა მდივანმა და დაღუპულთა ოჯახებს თანაგრძნობა გამოუცხადა. იენს სტოლტენბერგის განცხადებით, ავღანეთში, „მტკიცე მხარდაჭერის“ მისიაში მონაწილე სამხედროების რიცხვი ივნისის მინისტერიალზე მიღწეული შეთანხმების შედეგად გაიზრდება.

ამ დროისათვის, ნატო-ს მისიაში 39 ქვეყანა და 13 459 სამხედრო მონაწილეობს.

ყანდაღარის პროვინციაში მომხდარი თვდასხმის შემდეგ, 3 აგვისტოს ავღანეთის ისლამურ რესპუბლიკაში, ბაგრამის საავიაციო ბაზის მიმდებარე ტერიტორიაზე ერთობლივი მოტორიზებული პატრულირებისას განხორციელებული თავდასხმისას, „მტკიცე მხარდაჭერის“ მისიაში მონაწილე საქართველოს შეიარაღებული ძალების II ქვეითი ბრიგადის 23-ე ქვეითი ბატალიონის უმცროსი სერჟანტი, 25 წლის მდინარი ბებიაშვილი გარდაიცვალა. ამის შესახებ საქართველოს თავდაცვის სამინისტროს მიერ გავრცელებულ განცხადებაშია აღნიშნული.

მომხდარი თავდასხმისას ასევე, დაშავდა „მტკიცე მხარდაჭერის“ მისიაში მონაწილე საქართველოს შეიარაღებული ძალების სამი სამხედრო მოსამსახურე.