ავღანეთში დაღუპულ ქართველ უმცროს სერჟანტს სამშობლოში კვირას ჩამოასვენებენ. 25 წლის პროფესიონალი სამხედროსთვის ეს მესამე სამშვიდობო მისია იყო.

მდინარი ბებიაშვილი შეიარაღებულ ძალებში 2010 წლიდან მსახურობდა. ბაგრამის საავიაციო ბაზის მიმდებარე ტერიტორიაზე მსხვერპლი თვითმკვლელი ტერორისტის მოქმედებას მოჰყვა.

სხვადასხვა სახის ჭრილობებით ჰოსპიტალიზებულია კიდევ სამი ქართველი ჯარისკაცი. აქედან ერთის მდგომარეობას ექიმები მძიმედ აფასებენ.

სამშვიდობო მისიის ამერიკული სარდლობა თავდასხმას ტერორისტულ ორგანიზაცია „თალიბანს“ მიაწერს.

სხვადასხვა დროს განხორციელებული ორი აფეთქების შედეგად, დაშავდნენ ამერიკელი სამხედროებიც. შერეული კონტინგენტის საპატრულო კოლონაზე რადიკალებმა იერიში პატრულირების დროს მიიტანეს.

მდინარი ბებიაშვილი 32-ე სამხედროა, რომელიც საქართველომ საერთაშორისო სამშვიდობო მისიებში დაკარგა. თავდაცვის სამინისტროს შენობაზე დღეს სახელმწიფო დროშები დაშვებულია.