საქართველოს თავდაცის მინისტრმა ლევან იზორიამ ავღანეთის ისლამურ რესპუბლიკაში, ბაგრამის საავიაციო ბაზის მიმდებარე ტერიტორიაზე მომხდარი ტერორისტული აქტის შედეგად დაღუპული სამხედრო მოსამსახურის, უმცროსი სერჟანტის მდინარი ბებიაშვილის ოჯახს მიუსამძიმრა. მინისტრმა ღრმა მწუხარება გამოთქვა სამხედრო მოსამსახურის დაღუპვის გამო და ოჯახს მხარდაჭერა აღუთქვა.
ჟურნალისტებთან საუბრისას, თავდაცვის მინისტრმა აღნიშნა, რომ სამი დაჭრილი ქართველი სამხედრო მოსამსახურის ჯანმრთელობის მდგომარეობა არის დამაკმაყოფილებელი. მისი განცხადებით, უმცროს სერჟანტს მდინარი ბებიაშვილს საქართველოში კვირას გადმოასვენებენ.
თავდაცვის მინისტრთან ერთად, ზესტაფონის რაიონის სოფელ მარტოთუბანში იმყოფებოდა საქართველოს შეიარაღებული ძალების გენერალური შტაბის უფროსი, გენერალ-მაიორი ვლადიმერ ჩაჩიბაია, რომელმაც აღნიშნა, რომ შეიარაღებული ძალებისათვის უმცროსი სერჟანტი მდინარი ბებიაშვილი დიდი დანაკლისია.
სამხედრო მოსამსახურის ოჯახის წევრებს, ასევე შეიარაღებული ძალების გენერალური შტაბის ოფიციალურმა წარმომადგენლებმა მიუსამძიმრეს.