ევროკავშირმა რუსეთის წინააღმდეგ სანქციები გაამკაცრა, რაც ანექსირებულ ყირიმში „სიმენსის“ გაზის ტურბინების მიწოდებას უკავშირდება. სანქციები დაუწესდა რუსეთის სამ მოქალაქესა და სამ კომპანიას.

„ყირიმისა და სევასტოპოლის დამოუკიდებელი ენერგომომარაგების შექმნა მხარს უჭერს უკრაინისგან მათ გამოყოფას და ლახავს უკრაინის ტერიტორიულ მთლიანობას, სუვერენიტეტსა და დამოუკიდებლობას. გაზის ტურბინები წარმოადგენს არსებით ელემენტს ახალი ელექტროსადგურების განვითარებაში“, - ნათქვამია ევროკავშირის საბჭოს განცხადებაში.

ევროკავშირის „შავ სიაში“ მოხვდნენ ენერგეტიკის მინისტრის მოადგილე ანდრეი ჩერეზოვი, ამავე უწყების დეპარტამენტის ხელმძღვანელი ევგენი გრაბჩაკი და კომპანია „ტექნოპრომექსპორტის“ ხელმძღვანელი სერგეი ტოპორ-გილკა. შეზღუდვები ასევე დაუწესდა „სიმენსის“ პარტნიორ კომპანიებს - შპს „ტექნოპრომექსპორტს“, სს „ტექნოპრომექსპორტსა“ და „ინტერავტომატიკას“.

გაზის ტურბინების საკითხზე სკანდალი ივლისის დასაწყისში აგორდა, როდესაც სააგენტო Reuters-მა გაავრცელა ინფორმაცია, რომ ყირიმში ჩაიტანეს „სიმენსის“ მიერ წარმოებული ტურბინები. ეს კი ევროკავშირის მიერ დაწესებულ სანქციებს ეწინააღმდეგებოდა.

2014 წელს რუსეთის მიერ ყირიმის ანექსიის შემდეგ ნახევარკუნძულზე გაზის დანადგარების ჩატანა აკრძალულია. თავად კომპანია „სიმენსმა“ დაადასტურა, რომ ოთხი ტურბინიდან ორი მის მიერ იყო წარმოებული და რუსეთის ტერიტორიისთვის იყო განკუთვნილი. თუმცა ვლადიმერ პუტინის პრესმდივანმა განაცხადა, რომ დანადგარები რუსეთში იყო წარმოებული.