ფილიპინების დედაქალაქ მანილაში აშშ-ის სახელმწიფო მდივნისა და რუსეთის საგარეო საქმეთა მინისტრის შეხვედრა დასრულდა.
როგორც მოლაპრაკებების შემდეგ სერგეი ლავროვმა ჟურნალისტებს განუცხადა, მან რექს ტილერსონს კიდევ ერთხელ განუმარტა, როგორი იქნება რუსეთის პასუხი ვაშინგტონის მიერ ცოტახნის წინ მიღებულ სანქციებთან დაკავშირებით.
მისი თქმით, საპასუხო ზომების შესახებ ინფორმაცია თავად ტილეროსნამა მოითხოვა.
„კონტრსანქციების შესახებ რამდენიმე დღის წინ ტელეკომპანია „რასიას“ ეთერში ვლადიმერ პუტინმა დეტალურად ისაუბრა და განმარტა იმ გადაწყვეტილებების მიზეზები, რომელიც რუსეთმა მიიღო, ხანგრძლივის ლოდინის შემდეგ“, - განაცხადა ლავროვმა.
რუსეთისა და აშშ-ის პირველი დიპლომატები ფილიპინებზე მიმდინარე აზიური ქვეყნების სამიტის კულუარებში შეხვდნენ ერთმანეთს. ეს ლავროვისა და ტილერსონის პირველი შეხვედრა იყო მას შემდეგ, რაც დონალდ ტრამპმა რუსეთის წინააღმდეგ სანქციების გამკაცრების შესახებ კანონს ხელი მოაწერა.
მანამდე ტელეკომპანია „რასიას“ ეთერში რუსეთის ლიდერმა განაცხადა, რომ აშშ-ის ამ ნაბიჯის საპასუხოდ, მოსკოვი რუსეთიდან 755 ამერიკელ დიპლომატს გააძევებს.