საფრანგეთის პრეზიდენტი მეუღლეს პირველი ლედის ოფიციალურ სტატუსს სთავზობს. შეთავაზება ითვალისწინებს ბრიჯიტ მაკრონის ოფისის მოწყობას, თანამშრომლების დაქირავებასა და ხელფასის დანიშვნასაც კი. ფრანგების ნაწილი ამ იდეას არ ეთანხმება. საპროტესტო პეტიციას ხელი 150 ათასზე მეტმა ადამიანმა მოაწერა. ისინი მიიჩნევენ, რომ მსგავსი ცვლილებები მხოლოდ რეფერენდუმის ჩატარების გზით უნდა განხორციელდეს.

წინასაარჩვენო კამპანიის დროს ემანუელ მაკრონი ამომრჩევლებს დაპირდა, რომ გამარჯვების შემთხვევაში საფრანგეთის პირველი ლედის როლს „უკეთ განსაზღვრავს“. მაკრონი მიიჩნევს, რომ დღეს არსებული მდგომარეობა „ფრანგული თვალთმაქცობის“ ნათელი მაგალითია.

საფრანგეთის კონსტიტუცია ქვეყნის პირველი ლედის სტატუსს ოფიციალურად არ ცნობს, თუმცა კანონმდებლობა აძლევს საშუალებას პრეზიდნეტის მეუღლეს ქვეყნის ლიდერისთვის გამოყოფილი ბიუჯეტიდან წელიწადში 450 ათასი ევროს ოდენობით დაფინანსება მიიღოს, რაც მისი ოფისის ხარჯს, პირადი დაცვის და თანამშრომლების ხელფასს ფარავს.

როგორც Guradian-თან საუბარში ფრანგი მსახიობი და მწერალი ტიერ პოლ ვალეტა ამბობს, ამჟამად ბრიჯიტ მაკრონს უკვე ჰყავს ორი თუ სამი თანაშემწე, ასევე ორი მდივანი და პირადი მცველი, რაც მისი აზრით, სავსებით საკმარისია.

როგორც პრეზიდენტის ოპონენტები ასევე აცხადებენ, მაკრონის ახალი იდეა წინააღდმეგობაში მოდის მის მიერვე ინიცირებულ კანონთან, რომელიც ფრანგ დეპუტატებს ოფისში ოჯახის წევრების დასაქმებას უკრძალავს.

ბრიტანული გამოცემა ასევე აღნიშნავს, რომ არც გერმანიის კანცლერისა და არც გაერთიანებული სამეფოს პრემიერის მეუღლეს ოფიციალური სტატუსი არ გააჩნიათ.

განსხვავებული მდგომარეობაა აშშ-ში, სადაც დონალ ტრამპის მეუღლეს მელანიას ჰყავს 12 თანამშრომელი და აქვს „ოფიციალური სტატუსი“. ეს კანონი შტატებში 1978 წლიდან მოქმედებს.