სამოქალაქო პლატფორმა „ახალი საქართველო“ პროდასავლურ ოპოზიციურ პარტიებს, საზოგადოებრივ ორგანიზაციებსა და საზოგადოების აქტიურ წევრებს გაერთიანებისკენ მოუწოდებს.

„თავისუფალი დემოკრატები“, „საქართველოს რესპუბლიკური პარტია“ , „მოძრაობა სახელმწიფო ხალხისათ ვის“, „ერთიანი ნაციონალური მოძრაობა“„ევროპული საქართველო“ , „შენების მოძრაობა“ - დავით უსუფაშვილი, თბილისის მერობის დამოუკიდებელი კანდიდატი ალეკო ელისაშვილი - ეს იმ პოლიტიკური ძალების ჩამონათვალია, ვისაც ვაშაძე პრაიმერში მონაწილეობას სთავაზობს.

„ქართულმა ოცნებამ“ ქვეყანა ღრმა სტაგნაციაში შეიყვანა. თითოეული დღე, უფრო და უფრო ამძაფრებს ამ კრიზისს. თვითმმართველობის არჩევნები იძლევა შანსს, შევცვალოთ არაფორმალურ მმართველობაზე დამყარებული ხელისუფლება.

ცხადად ჩანს, რომ „ქართული ოცნება“, ხელისუფლების შესანარჩუნებლად, მზადაა ყველა საშუალება გამოიყენოს.

ასეთ პირობებში, გათითოკაცებული ოპოზიციისათვის განსაკუთრებულად რთული იქნება სახელისუფლებო კანდიდატის დამარცხება.

მნიშვნელოვანია, პროდასავლური ოპოზიციური ელექტორატის კონსოლიდაცია და მობილიზება საერთო მიზნის მისაღწევად - ჩვენი ამოცანაა არ დაიკარგოს არც ერთი ოპოზიციური ხმა“, - განაცხადა გიორგი ვაშაძემ.

ვაშაძე მოუწოდებს პროდასავლურ ოპოზიციურ პოლიტიკურ ძალებს, საზოგადოებრივ ორგანიზაციებსა და საზოგადოების აქტიურ წევრებს, დემოკრატიული პრინციპების გარშემო გაერთიანდნენ და მაქსიმალურად ღია და კონკურენტული გზით (პრაიმერით) აირჩიონ მერობისა და საკრებულოს საერთო კანდიდატები.

ვაშაძე ფიქრობს, რომ ბრძოლა არჩევნებში უნდა იყოს გამარჯვებისთვის და არა მეორე ტურში მონაწილეობისთვის. „ახალი საქართველოს“ ლიდერის აზრით, ცალკ-ცალკე მიმავალი ოპოზიციური კანდიდატები და პარტიები ნიშნავს „ქართული ოცნების“ თამაშს, რადგან ოპოზიციურად განწყობილი 70- პროცენტიანი ელექტორატი დაინახავს, რომ ბრძოლა მიმდინარეობს რაღაც გაუგებარი მეორე ტურისთვის და არა გამარჯვებისთვის, შესაბამისად ხმები დაიყოფა და დაიქსაქსება.

„გაერთიანების ერთადერთი გზას არის ღია პრაიმერი, როგორც მერობის და გამგებლობის, ასევე მაჟორიტარების და პარტიული სიების შესარჩევად. კულუარული მოლაპარაკებები იწვევს უნდობლობას საზოგადოებაში და ჩვენი გამარჯვებისთვის აუცილებელია ახალი, ღია გახსნილი და გამჭვირვალე პოლიტიკური კულტურის ჩამოყალიბება. მზად ვართ თქვენთვის სასურველ დროს ვისაუბროთ კონკრეტულ მექანიზმებზე;

ამ ტიპის პრაიმერის ჩატარების პრეცედენტი ჯერ საქართველოში არ ყოფილა, შესაბამისად ვფიქრობთ რომ სუსტ წინა საარჩევნო კამპანიას, რისი თვითმხილველებიც ახლა ვართ, პრაიმერი მისცემს ახალ ძლიერ იმპულსს. ჩვენი კონსოლიდაცია, მიიპყრობს ოპოზიციური ელექტორატის ყურადღებას, გააჩენს ნდობას საზოგადოებაში საარჩევნო პროცესის მიმართ, დაგვეხმარება საბოლოო გამარჯვებაში;



მნიშვნელოვნად მიგვაჩნია, პრაიმერისზე მოწვეულ იქნას არასამთავრობო სექტორი, როგორც პრაიმერის საარჩევნო პროცედურის ორგანიზატორი. ასევე საერთაშორისო დამკვირვებლები. გამოყენებულ უნდა იქნას ცესკო-ს ორგანიზაციული და მატერიალური რესურსი;

გთხოვთ ყველა ზემო აღნიშნულ საკითხთან დაკავშირებით გვაცნობოთ თქვენი არგუმენტირებული პოზიცია, რომ ნაცვლად ზოგადი შეფასებისა კონკრეტულად გავიგოთ თქვენი მოსაზრება, რას ეფუძნება, რა გათვლებსა და რა გამოცდილებას.

თუ არის სხვა მოსაზრებები, შეთავაზებებთან დაკავშირებით, გთხოვთ გვაცნობოთ" - განაცხადა გიორგი ვაშაძემ.