თბილისის მერი დავით ნარმანია, თბილისის მიწათსარგებლობის ახალი გენერალური გეგმის ავტორთან ერთად, დეველოპერული კომპანიების წარმომადგენლებს ხვდება.

გენერალური გეგმის ერთ-ერთი ნაწილი დედაქალაქის განაშენიანება და მშენებლობების ქალაქის ცენტრიდან პერიფერიებში გადატანაა.

პროექტის ავტორის, მერაბ ბოლქვაძის განცხადებით, ქალაქში მშნებელობების სიმჭიდროვე საკმაოდ მაღალია და აუცილებელია ალტერნატიული გზების გამონახვა.

გეგმის მიხედვით, ახალი მშენებლობებისთვის დედაქალაქის მასშტაბით გამოყოფილია ძველი საწარმოო ტერიტორიები, რომლის საერთო ფართობი 800 ჰექტარია და ასევე პოლიცენტრული არეალები დიდუბეში, გლდანში, სამგორში, თემქასა და მუხიანში.

„ეს მერვე შეხვედრაა, სადაც საქმიანი სფეროს წარმომადგენლებს, მშენებლებს ვხვდებით. ვისაუბრებთ მიწათსარგებლობის გეგმის ამოცანებზე, მიზნებზე. მათთან ერთად მრავალ საკითხზე შეიძლება მსჯელობა. გავითვალისწინებთ კონკრეტულ შენიშვნებს, წინადადებებს და ეს აისახება გენერალურ გეგმაში”,-აღნიშნა მერაბ ბოლქვაძემ.

დედაქალაქის მერის, დავით ნარმანიას განცხადებით კი, დღევანდელი შეხვედრის მიზანია მიწათსარგებლობის განვითარების გენერალურ გეგმაში აისახოს დეველოპერთა პოზიციებიც.

„დაახლოებით წელიწადნახევრის წინ ქალაქის ინტენსიურ უბნებში შევწყვიტეთ k2 კოეფიციენტის გაცემა, რითაც ამ ნაწილების არასწორი განვითარება შეჩერდა და მხოლოდ განაშენიანების რეგულირებით ხდება მათი განვითარება. სადაც შედარებით დაბალი განაშენიანებაა, იქ თავად მოქალაქეებმა უნდა გადაწყვიტონ, რომელი ბანი იქნება მათთვის საცხოვრებლად საინტერესო და მიმზიდველი"- აღნიშნა ნარმანიამ.

დეველოპერები მშენებლობების პერიფერიებში გადატანას მიესალმებიან, თუმცა აცხადებენ, რომ ყველა დეველოპერებში საერთო თამაშის წესები უნდა მოქმედებდეს.

თბილისი მიწათსარგებლობის გენერალური გეგმის დამტკიცება 20 სექტემრისთვის იგეგმება. მანამდე კი, დოკუმენტის განსახილველად კიდევ რამდენიმე შეხვედრა გაიმართება.