ხაშურში საავადმყოფოს მედპერსონალმა გაფიცვა შეწყვიტა. როგორც საზოგადოებრივს კლინიკის ერთ-ერთმა თანამშრომელმა განუცხადა, საავადმყოფოს ხელმძღვანელობა მათ სახელფასო დავალიანების სრულად დაფარვას დაპირდა. მისი თქმით, საუბარია ოთხი თვის ხელფასის ანაზღაურებაზე.
საზოგადოებრივთან კლინიკის თანამშრომელი ამბობს, რომ საავადმყოფოში სექტემბრიდან ახალი კომპანია „ევექსი“ შემოდის და როგორც მისმა წარმომადგენელმა გაფიცულ ექიმებს განუმარტა, სახელფასო დავალიანების დაფარვის პასუხისმგებლობა ხელშეკრულებით ამჟამინდელ მფლობელს „ალიანს მედ სერვისს“ ეკისრება, თუმცა იმ შემთხვევაში, თუ „ალიანს მედ სერვისს“ არ შეასრულებს აღნიშნულ ვალდებულებას, მაშინ უახლოეს პერიოდში „ევექსი“ გადაიხდის სახელფასო დავალიანებას.
როგორც საზოგადოებრივს კლინიკის ერთ-ერთმა თანამშრომელმა განუცხადა, ხაშურის საავადმყოფოში თანამშრომელთა ხელფასების რაოდენობა 100-დან 500 ლარამდე მერყეობს.
ხაშურში საავადმყოფოს ექიმები დღეს დილით, სახელფასო დავალიანების ჩარიცხვის მოთხოვნით გაიფიცნენ.